(AFP)—Gobernador di New York Kathy Hochul a priminti diabierna di cera un loophole legal cu ta permiti delincuentenan den e estado evita acusacion di violacion si nan victima tabata boluntariamente bou influencia, manera den caso di un supuesto violacion den grupo na Cornell University.
Tin hopi indignacion na Merca despues di decision di fiscalnan pa no presenta acusacion den e caso na e universidad Ivy League dos aña pasa, locual a causa cu e gobernador a nombra Fiscal General di estado Letitia James como fiscal special.
E investigacion a habri back dialuna despues cu e supuesto victima a presenta un demanda civil, aumentando acusacionnan cu e universidad prestigioso no a castigo e acusadonan debidamente.
E supuesto victima a bisa den su demanda cu na 2024 shete miembro di fraternidad Chi Phi a drog’e cu ketamina, agredie y viol’e pa. “No mester importa si nan mes a dicidi di uza droga of alcohol. Ta bou influencia boluntariamente no ta un permiso pa agresion sexual of violacion den grupo. Punto,” Hochul a bisa diabierna.
“Mi ta sostene pa cera e loophole aki, y lo traha cu Parlamento di Estado New York pa logra esaki.”
Varios estado Mericano, incluyendo New York, tin disposicionnan den nan ley cu ta hacie mas dificil pa fiscalnan presenta acusacion contra un persona cu a tene sexo cu un hende ken boluntariamente tabata bou influencia te na e punto cu e no por a duna of nenga consentimento na un manera significativo.
Shiwali Patel, director senior di Education Justice na National Women’s Law Center, a bisa AFP cu “ta simplemente sorprendente cu e loophole aki ta existi ainda.”
“E tin un impacto grandi riba casonan na universidad pasobra e realidad ta cu un mayoria significativo di agresionnan sexual riba campus ta envolve alcohol y droga,” el a bisa.
Hochul a critica fuertemente e manera cu a maneha e investigacion inicial di e declaracionnan di e victima.
“El a sinta pa oranan y a conta (polis) exactamente kico a pasa cu ne. Y segun reportahenan nobo, e no por tabata mas cla cu e tabata 100 porciento sigur cu nan a viol’e,” Hochul a bisa.
“Den ki mundo polis por tende for di un victima cu literalmente nan a viol’e den grupo mientras e tabata bou influencia… den cas di e fraternidad, y no pasa e acusacionnan ey pa fiscal di distrito?”
James a bisa diabierna cu e lo “revisa e hechonan, reuni evidencia, entrevista testigonan y, si tin suficiente base, sigui cu acusacionnan.”
Fiscal di Distrito di Tompkins County Matthew Van Houten a bisa e siman aki cu su oficina ta planea pa presenta acusacion criminal contra e shete hombernan. El a bisa cu su oficina a dicidi di no procesa na 2024 pasobra testimonio di e victima no a establece falta di consentimento.
Despues di e acusacionnan, Cornell a cera e fraternidad y suspendi temporalmente e studiantenan supuestamente envolvi, y varios di nan despues a keda expulsa.
Studiantenan di Cornell a tene un reunion riba campus diahuebs unda emocionnan a subi halto.
Oradornan repetidamente a critica administradornan di e universidad pa e manera cu nan a maneha e caso, cu a haya atencion den henter Merca. “Ningun oficial publico por wak otro banda ora e sistema faya y no ta proteha nos hobennan. Y como gobernador, mi no lo permiti ningun hende sconde e caso aki bou tapijt,” Hochul a bisa diabierna.
