Contra deseo di gobierno y parlamento di St. Maarten, Hulanda a laga instala un camara di integridad (‘Integriteitskamer’) cu lo mester percura pa un maneho contra di corupcion y politica partidario.
Algun dia pasa e minister encarga cu asuntonan di reino, Ronald Plasterk a intermedia na Curaçao, poniendo tur cos den man di e gobernador di pais. Awor a toca turno na un otro isla, cu supuestamente ta autonomo, pa motibo cu segun Plasterk tin diferente rapport ta demostra cu tin hopi iregularidad den tur nivel di gobernacion y cu e pais a demostra di no tin e instrumentonan adecua pa controla esaki. E tarea di e camara aki ta pa mantene un control estricto riba e gobierno ora cu tin sospecho di corupcion, soborno y politica partidario (vriendjespolitiek). E camara tambe lo mester haci investigacion independiente na momento cu tin sospecho di cualkier iregularidad. Si ta sinti cu ta necesario, e camara aki lo mester sigui pa entrega un keho penal na ministerio publico.
Locual ta interesante di e situacion aki ta cu e instituto ta wordo nombra pa Gobierno di Reino y nan ta raporta direct na dje tambe, pues gobierno di St. Maarten no tin nada di bisa den e instituto aki.
