Reconstruccion di Mocoa por tarda te 3 aña

Reconstruccion di ciudad di Mocoa na Colombia, cu a resulta afecta pa un avalancha di lodo y piedra, y cu a laga te na E momento aki 303 morto y 314 hende cu ta registra como desapareci, por tarda te 3 aña, Luis Carlos Villegas a informa.

Luis Villegas ta e funcionario cu Presidente di Colombia, Juan Manuel Santos a nombra como director di programa di reconstruccion di Mocoa, capital di departamento di Putumayo. Villegas a bisa cu obranan cu mester construi na e zona ey, por tarda entre  2 pa 3 aña, segun pronostico di gobierno di Colombia.

“Reconstruccion di tuberia di awa, di infrastructura electrico, construccion di e lugar conoci como malecón,  reconstruccion di henter oriya di riunan y di cas lo tarda cerca di 2 aña” Villegas a splica.

E funcionario a splica cu reconstruccion di Mocoa a cuminsa awor den periodo di gobierno di presidente Juan Manuel Santos, pero cu lo finalisa den e proximo  periodo, bao direccion di e proximo presidente cu lo keda eligi na 2018.

“Nos lo bay tin un periodo di transicion entre gobierno aki y otro gobierno, pa tal motibo ta hopi importante pa no detene e proceso, y laga cla varios contrato di obra y cu trabao por avansa. E idea ta pa tin tur cos cla mas lihe cu ta posibel , nos ta pensa  cu den menos di 12 luna nos por cuminsa entrega e prome grupo di cas”, el a declara.

Villegas a ser scogi pa presidente Santos, pasobra e tin hopi experiencia den  tragedia manera esaki, pa motibo di e posicion cu e tabatin den e proceso di reconstruccion di ciudad Armenia, capital di departamento di Quindio, cu a resulta afecta pa un teremoto na januari di 1999 y cu a laga mas di mil hende morto y cu hopi daño material.

Instituto di Medicina Legal a duna  di conoce un informa, den cual e cantidad di morto causa pa e avalancha di diasabra pasa na Mocoa, a yega te na 303 persona. Diaranson presidente Santos a bisa cu ekipo di rescate ta continua cu buskeda di 314 persona cu a  desaparece y cu nan famia ta busca desesperadamente.  Santos a informa tambe cu 332 persona a ser atendi na diferente hospital pa diferente herida.

E tragedia a sucede ora cu tres riu y un rooi cu ta pasa cerca di Mocoa a desborda, pa motibo di hopi awacero cu a afecta mas di mita di region. E region ta conta cu 50 mil habitante.

Gobierno a decreta emergencia economico, social y ecologico, cu obhetivo di desvia algun recurso for di presupuesto original, pa emergencia aki y pa asina por duna atencion na persona den situacion di emergencia na Mocoa.

You May Also Like

Venezuela: Accion di enfermeronan ta continua

E enfermeronan Venezolano a protesta ayera pa di dos dia consecutivo exigiendo salario husto ...

Minister di husticia di Brasil a vincula polis cu crimen organisa

Den un crisis di seguridad, minister di husticia di Brasil, Torquato Jardim, a bisa cu ...

Puerto Rico: beneficia cu fracaso di plan medico di Trump

E comisionado na Washington pa Puerto Rico y e director ehecutivo di e Administracion ...

Consul honorario di Honduras deteni pa estafa

Polis di Bolivia a aresta e consul honorario di Honduras, Iris Grisel Berlioz, despues ...

Venezuela: Aumento salario minimo ta sigui fomenta inflacion

E incremento salarial decreta pa presidente Nicolas Maduro diahuebs pasa ta genera atrobe mas ...