Gobierno kier traha cu TNO mas flexibel y menos costoso

ORANJESTAD – E instituto di investigacion TNO ta cera su portanan na Aruba. Prome minister, Evelyn Wever-Croes a declara cu gobierno di Aruba ta lamenta cu TNO ta cera e aña aki, ya cu su contract ta caba.

“Di un banda mi ta lamenta; pero di otro banda mi tin cu bisa si cu nos ta keda cu e lasonan cu TNO,” el a declara. E mandatario a declara cu e instituto renombra aki tin un contract cu gobierno di Aruba pa bastante miyones. Ademas, gobierno ta paga nan huur, pues e ta uno bastante extenso den gasto. Tur aña nan ta fiha un programa di proyectonan, cu nan ta haci di acuerdo cu e placa cu gobierno ta paga nan.

E gobierno actual (MEP-POR-RED) a informa TNO cu nan no por sigui cu e sistema aki. Aunke nan kier sigui traha cu nan den otro forma, ya cu nan ta un instituto tecnologico importante. Pero gobierno kier traha cu TNO a base di loke nan ta considera cu ta un necesidad. Esaki den cuadro di gobierno su plan economico pa desaroya seis sector, entre nan innovacion y economia di conocemento. Kiermen e no mester ta necesariamente loke TNO ta pone como e areanan cu nan por yuda cune.

E ta reconoce cu aña pasa TNO a hunga un rol hopi importante den e area di maneho di desperdicio, unda a wordo haci algun cambio riba e programa di e proyecto aki, pa asina mas placa por wordo aloca eynan. Otro caso cu a presenta tin di haber ora cu e proyecto di renobacion y expansion di hospital a presenta diferente problema, gobierno a pidi pa TNO haci un investigacion riba e calidad di e aire.

Pero e prijs cu nan a pidi tabata 175 mil dollar extra, aparte cu gobierno ta paga un suma pa nan presencia na Aruba. Mientras cu e mesun estudio aki a wordo haci pa 40 mil dollar pa otro instancia na Merca.

Pero debi cu e ta un contract a base di un programa di proyectonan fiho, gobierno no por haci uzo di nan experticio pa algo otro denter di e suma di 3.9 miyon florin cu gobierno ta paga na TNO. Segun premier Wever-Croes, nan ta prefera di bay na un areglo mas flexibel, a base di e necesidad di gobierno di Aruba, y nan lo sigui haci esaki. Asina como gobierno nan no ta keda mara na TNO so, sino cu nan por haci uzo di otro instancia internacional. Ya cu ora cu gobierno no tin e contract grandi aki mas, nan por keda mas liber y flexibel pa keda aplica nan propio programa y proyectonan.

A base di nan combersacion –segun e prome mandatario– TNO a informa gobierno cu den realidad ‘e modelo di Aruba no ta rentabel.’ Nan a purba pa medio di expande nan oferta tambe na otro pais, manera Colombia. Sinembargo, esaki no a duna e rentabilidad cu nan tabata kier.

E prome mandatario a afirma cu Aruba ta keda cu e laso cu TNO. Na momento cu nan kier haci un investigacion cu nan mester di e instituto aki, e portanan ta keda habri. No mas cu no tin un presencia di TNO na Aruba mas; pero e relacion aki ta sigui y e ta bay ta mas dirigi riba e necesidadnan cu Aruba tin.

You May Also Like

site.png

Alrededor di 28 pashent pa luna AZV ta manda pa Bucaramanga

Nathalia Pico kende ta encarga di e seccion comercial di Fundacion Cardiovascular na Bucaramanga ...

10.000 votado mester di un identificacion valido

Despues  cu publicacion di e entrevista cu e presidente di nos Conseho Electoral Hubert ...

SVb inversion digital.jpg

SVb ta inverti casi 3 miyon florin di nan fondo pa digitalisa nan servicionan

Den cuadro di existencia di nos Banco di Seguro Social (SVb) su 30 aña ...

Plan nacional di maneho economico presenta diaranson venidero

ORANJESTAD – Dia 17 di april venidero, gobierno lo presenta e maneho economico pa ...

gobernadornan.jpg

Alfonso Boekhoudt gobernador nobo entrante 2017

Alfonso Boekhoudt ta e proximo gobernador di Aruba entrante 1 di januari 2017. na ...

combustibel

Gasoline 14.2 cen mas barata

Awe 14 di october e prijsnan di combustibel a baha. Pa un liter di ...