Gobierno di Aruba a anuncia introduccion di un permiso di trabao temporal di seis luna cuminsando desde 1 di december 2026, como parti di un adaptacion den su maneho di admision di trahadornan stranhero.
Durante un conferencia di prensa, minister Arthur Dowers a splica cu e medida ta destina pa atende e falta di personal den diferente sector economico, particularmente turismo, horeca y construccion. Na mesun momento, gobierno ta anuncia control mas estricto riba empleo ilegal y ta prepara otro cambionan den su maneho migratorio pa januari di 2027.
Minister di Husticia, Energia, Transporte Publico y Integracion, Arthur Dowers, a splica cu gobierno a evalua e maneho actual di admision despues di mantene combersacion cu diferente gremio y representante di sector empresarial. E evaluacion a mustra cu, aunke e restriccionnan anterior a contribui na un miho control di entrada di trahadornan stranhero, nan a crea tambe dificultad pa empresanan cu tin necesidad urgente di personal.
E situacion ta particularmente importante den e periodo actual, ora Aruba ta preparando pa temporada halto di turismo. Diferente empresa a indica cu nan ta enfrenta dificultad pa haya suficiente trahador y, den algun caso, pa mantene e personal cu nan a logra contrata.
Pa atende e necesidad aki, gobierno a dicidi introduci un permiso temporal cu lo permiti dunadornan di trabao recruta personal pafo di Aruba pa un periodo di seis luna. E posibilidad nobo lo ta disponibel cuminsando 1 di december, mientras gobierno ta preparando otro adaptacionnan den e maneho di admision pa januari di 2027.
E permiso di seis luna lo ta destina specificamente pa dunadornan di trabao cu tin necesidad di personal. Esaki ta nifica cu e peticion mester ta relaciona directamente cu un empresa cu ta ofrece trabao y cu ta asumi responsabilidad pa e trahador.
Pa un empresa por bini na remarke, e mester tin su obligacionnan fiscal na ordo y cumpli cu su responsabilidadnan cerca Sociale Verzekeringsbank (SVb). Ademas, e dunador di trabao mester percura pa e trahador tin un seguro adecuado durante su estadia na Aruba.
Minister Dowers a enfatisa cu e persona cu lo bini traha bao di e sistema aki mester ta pafo di Aruba na momento di aplicacion. Un persona cu ya ta na Aruba sin e permiso necesario no por simplemente cambia su situacion mediante e procedemento nobo.
Den e casonan aki, e persona mester sali for di pais y sigui e procedemento di aplicacion for di exterior. E rekisito aki ta forma parti di e esfuerso di gobierno pa mantene control riba entrada di trahadornan stranhero.
E permiso temporal no lo elimina tur e otro rekisitonan cu normalmente ta aplica pa admision di un trahador stranhero. Solicitantenan lo mester presenta e documentonan necesario, incluyendo prueba di bon conducta y otro informacion cu autoridadnan ta exigi.
Un diferencia importante ta cu e procedemento di seis luna lo ta menos complica cu algun di e otro trayectonan di permiso existente. Gobierno kier evita cu e cantidad di rekisito y e tempo di tramitacion ta impedi empresanan di atende necesidadnan urgente di personal.
Segun Dowers, DIMAS lo haci su maximo esfuerso pa procesa e peticionnan completo den aproximadamente dos siman. Sinembargo, e minister a aclaria cu esaki ta depende di e dunador di trabao entrega tur documentacion corectamente. Gobierno ta recomenda empresanan prepara nan documentonan prome cu 1 di december, e fecha cu e aplicacionnan lo por cuminsa.
E medida nobo ta relaciona directamente cu e necesidad di personal identifica den diferente sector. Entre e areanan menciona durante e conferencia di prensa tin hotelnan, particularmente housekeeping, restaurant, personal di servicio, bartenders y otro funcionnan relaciona cu horeca.
Sector di construccion tambe ta registra demanda pa trahadornan, mientras actividadnan relaciona cu propiedadnan di huur di corta duracion, manera Airbnb, ta genera necesidad adicional di personal. Otro sector cu ta mustra aumento den demanda ta esun di bienestar y cuido personal, incluyendo servicio di cabey, huña y masahe.
E mandatario a indica cu Ministerio di Labor ta evaluando e cifranan di mercado laboral pa determina cua categorianan di trabao lo por bini na remarke pa permiso regular di prome aplicacion den futuro.
E evaluacion aki ta importante, pasobra gobierno no kier facilita entrada di personal stranhero den funcionnan caminda tin suficiente persona disponibel na Aruba pa ocupa e vacaturanan. Pa e motibo aki, e posibilidad di pidi un permiso di seis luna por ser adapta segun desaroyonan den mercado laboral.
E permiso temporal tampoco ta destina pa intermediario cu ta recluta personal pa despues busca trabao pa nan. E empresa cu ta pidi e permiso mester ta e dunador di trabao real y asumi responsabilidad directo pa e persona cu ta bin traha.
Dowers a adverti cu gobierno lo controla e cantidad di trahadornan cu cada empresa ta pidi. Si un empresa purba trece un cantidad excesivo di trahadornan sin un necesidad real, autoridadnan por investiga si e empresa ta actuando manera intermediario di personal. Den caso di abuso, gobierno por nenga peticionnan di permiso, incluyendo aplicacionnan den futuro.
Otro aspecto importante ta cu e trahador lo ta autorisa pa traha solamente cerca e dunador di trabao cu a solicita su permiso. Si e relacion laboral caba prome cu e seis lunanan pasa, e dunador di trabao mester informa autoridadnan.
E trahador no por simplemente cambia di empresa y sigui traha na Aruba bao di e mesun permiso. Pa aplica pa un otro oportunidad, e persona lo mester sigui e procedemento corespondiente for di pais.
Despues di seis luna, e permiso temporal lo yega na su fin y e persona mester sali di Aruba. E posibilidad di solicita un permiso nobo of sigui un otro trayecto migratorio lo depende di e reglanan aplicabel.
Durante e conferencia di prensa, minister Dowers a anuncia tambe cu gobierno ta preparando un cambio den e periodo cu cierto trahadornan stranhero mester keda relaciona cu nan prome dunador di trabao.
Segun e anuncio, gobierno kier bolbe na un periodo di dos aña, en bes di tres aña, pa e relacion laboral inicial den e casonan corespondiente. E minister a splica cu un trahador no ta obliga pa keda den un trabao contra su boluntad, pero si e persona dicidi di kibra e relacion laboral, esaki no ta nifica automaticamente cu e por keda na Aruba y cambia di dunador di trabao.
E cambio ta relaciona cu e esfuerso di ofrece mas stabilidad na empresanan cu ta inverti den reclutamento di personal stranhero, mientras autoridadnan ta mantene supervision riba e condicionnan laboral.
Otro tema trata durante e conferencia ta e situacion di aproximadamente 1.500 persona cu a haya permiso temporal mediante e proceso Hunto pa Progreso, cu a caba na december di aña pasa.
Segun minister Dowers, un parti di e permisonan aki a vence of ta yegando na nan fecha di vencemento durante e ultimo lunanan di 2026. Gobierno a haci un apelacion na e personanan concerni pa verifica nan situacion migratorio y pidi un permiso nobo si nan ta cumpli cu e rekisitonan.
E mandatario a indica cu e personanan cu no regularisa nan situacion den e periodo corespondiente lo mester bandona Aruba. E posibilidad di sigui un otro trayecto di permiso ta depende di e condicionnan legal aplicabel na cada caso.
Na mesun momento, minister Dowers a dedica atencion na e problema di empleo ilegal. El a adverti dunadornan di trabao cu ta emplea persona sin permiso cu por tin consecuencia financiero y legal serio.
Durante e conferencia, el a menciona un accidente reciente na un luga di trabao, caminda un persona a cay y despues a resulta cu e no tabatin status legal pa traha na Aruba. E caso ta bao di investigacion pa determina e responsabilidadnan corespondiente.
Segun minister Dowers, emplea un persona sin permiso por conduci na multa di Afl. 10.000 den caso di un individuo y Afl. 25.000 den caso di un empresa. Ademas di e aspecto legal, gobierno ta preocupa pa e gastonan cu por surgi ora un trahador sin seguro adecuado resulta herida of mester atencion medico.
Dowers a enfatisa cu e controlnan no ta destina pa stroba actividad economico, sino pa limita riesgo pa trahador, empresanan y comunidad. Autoridadnan ta organisando inspeccionnan a base di informacion y datonan disponibel, mientras diferente departamento gubernamental ta colaborando pa identifica posible iregularidadnan.
Gobierno ta mantene cu e introduccion di e permiso di seis luna no ta un flexibilisacion sin condicion. Empresanan cu kier haci uzo di e posibilidad nobo lo mester cumpli cu nan obligacionnan, mientras autoridadnan lo sigui supervisa e sistema pa evita abuso.
Cu e entrada den vigor di e procedemento nobo dia 1 di december, gobierno ta busca facilita contratacion di personal stranhero den un periodo relativamente cortico, manteniendo na mesun momento control riba mercado laboral y cumplimento di e reglanan migratorio di Aruba.



