ORANJESTAD – Tur esunnan cu a cumpra un carchi di entrada na tempo y tabata diaranson anochi den Renaissance Convention Center ta describi e anochi como uno grandi y memorabel. Un celebracion digno pa marca e 50 aniversario di Grupo di Betico, un di e formacionnan musical di mas gusta y admira den e cultura Arubiano.

E capacidad di 1.200 persona cu e sede tin a yega su limite y for un dia prome caba por a bisa cu e concierto tabata agota. E nivel musical sigur tabata halto danki na e amigo y invitadonan cu a compaña e integrantenan di Grupo di Betico riba scenario.

Adicional na figuranan conoci di nos isla manera Sharon Rose y Rocco Franken, tambe tabatin Izaline Calister y Orkesta Sinfonico di Venezuela. Masha pabien na Grupo di Betico cu nan 50 aniversario, hopi bendicion pa sigui deleita e pueblo Arubiano cu nan talento y tambe un pabien na tur esunnan responsabel pa e exitoso produccion aki.