Richard Charles y Marva Groeneveldt: ‘Nos ta sinti cu nos ta haciendo algo positivo pa mucha’

ORANJESTAD – Soccer Education Center Aruba ta un organisacion cu a ser crea un aña y mei pasa. Dos di su miembronan a haya e idea di haci e proyecto aki realidad, ora nan tabata wak e muchanan hunga riba speelplaats. Tabatin tambe weganan entre scol y semper e muchanan tabata sali campeon; for di esey nan a dicidi di pone e muchanan den competencia di futbol na Aruba.

Durante un entrevista cu Bon Dia Aruba a tenei cu Richard Charles, tesorero y Marva Groeneveldt, miembro, di e directiva di Soccer Education Center Aruba, nan a duna di conoce cu e organisacion ta ofrece e muchanan les di futbol, cu e obhetivo cu e muchanan por adkiri mas conocemento di futbol y via esey nan por haya disciplina, educacion y motivacion pa den futuro nan por ta riba bon caminda.
Richard a comenta cu el a mira hopi team na Aruba cu ta hunga futbol bon pero cu falta tecnica. For di esey nan a conclui cu lo ta bon pa lanta e scol di futbol pa tur e muchanan por bay hunga futbol. Asina nan por adkiri mas conocemento y despues nan lo por bay pa un team profesional. E muchanan ta asisti tur diabierna na training, di 5or y mey te 7or na stadion Frans Figaroa.

Richard a splica cu “nos t’ey pa e muchanan cu ta hunga futbol y pa esnan cu no ta hunga futbol pero nan kier siña hunga futbol.” E scol ta duna les tanto na mucha homber como na mucha muhe, entre 4 y 16 aña. El a splica cu Soccer Educacion Center ta concentra hopi riba e parti di educacion tambe, no solamente futbol, pa e muchanan por bay bon na scol y den comunidad. El a duna di conoce tambe cu nan ta coopera cu International School, pa e muchanan ta miho prepara pa nan por haya un beca (scholarship) na Merca.

Tambe el a comenta cu nan kier cuminsa tambe cu un opleiding pa coach, un curso dirigi na e coachnan pa nan siña con pa atende e muchanan. El a expresa cu hopi di e muchanan sa hunga futbol pero nan no sa e reglanan. E ta conta cu aworaki nan ta trahando riba un proyecto, pa traha cu e teamnan internacional pa nan por bin y coopera cu e organisacion. Tambe el a expresa cu el a mira cu na Aruba futbol ta un di e deportenan mas practica, pa motibo cu ta mas facil pa e muchanan participa den deporte cu futbol. E ta mas barata pa motibo cu e muchanan mester di un bala so; esaki por pone mas mucha riba cancha.

E ta bisa cu “awendia tur mucha ta tras di telefon, di computer y hopi mayor tin problema cu esey; e mayornan ta duna nan tur cos gratis pero nan no ta ricibi nada mas.” Pa loke tin di haci cu e organisacion, el a bisa cu den poco tempo como organisacion nan ta bayendo bon, poco poco aworaki hopi hende ta coopera cu nan, por ehempel e director di International School. E training ta pa e muchanan adkiri mas disciplina, Marva Groeneveldt ta comenta cu Soccer Education Center ta un organisacion cu ta creciendo poco poco. Na Aruba tin diferente scol di futbol cu ta activo riba e tereno aki. E ta conta cu nan a cuminsa cu dos muchan un aña y mey pasa y awor aki tin casi 40 mucha cu tur diabierna ta asisti na e training cu hopi entusiasmo.

Tur mucha cu kier adkiri mas conocemento di futbol por asisti na e training; nan ta splica cu tin mucha cu ta pertenece na varios team na Aruba, e programa no ta dirigi riba e muchanan cu ta bay competi sino pa siña e muchanan di bon manera con pa hunga futbol di manera tecnico. Richard Charles ta splica tambe cu “nos no t’ey pa placa, nos t’ey pa e muchanan por mehora.”

E muchanan manera e ta bisa, tin bon coach cu ta yega na tempo na stadion, nan tin disciplina y nan sa kico balor tin. Via e programa aki el a mira con e muchanan ta bay dilanti, nan ta progresando y tin di nan cu e mayornan ta bisa cu nan no kier falta training pa nada. “Nos ta sinti cu nos ta haciendo algo positivo pa e muchanan,” Marva ta bisam cu ta e persona cu ta sinta durante e training cu e mayornan y ta bisa cu nan ta conta cu e muchanan ta hopi motiva pa asisti na e training, y esey ta e idea, cu e muchanan por siña y por disfruta. Tambe el a bisa cu si e muchanan ta haci deporte of otro actividad, e por yuda nan pa keda riba e caminda corecto; mayoria di muchanan hopi biaha no kier haci nada y deporte ta un distraccion y relahacion pa nan.

Pa termina Richard ta bisa cu via e programa e muchanan lo por bira hasta profesional, aunke esey no ta e meta general. Den tur caso ta importante pone hopi atencion riba educacion, pa yuda nan tambe bira miho na scol. E ta expresa tambe “cu tur muchanan ta bonbini” tur diabierna na stadion Frans Figaroa, y ta spera cu e muchanan lo por sigui bay dilanti.