Aruba Tourism Authority (ATA) a mustra su preocupacion cu e accion cu un grupo di alrededor di 15 restaurant, situa den e area di Palm Beach, a bin cune diasabra anochi, debi na e ultimo medida cu crisis team a introduci pa combati e contagio di mas caso di Covid-19.

E medida tin di haci specificamente cu e cambio di orario di e toque de queda (TDQ) di 12or mei anochi pa 10or di anochi. Esaki ta haci cu e sector importante aki di nos industria turistico mester cera mas tempran. Kiermen nan mester cera full nan operacion mas tarda 9or di anochi pa por cumpli cu orario di TDQ.

Mientras cu mayoria di nan clientenan ta gusta bishita e restaurantnan den e area aki banda di 8or di anochi. E cambio di orario di dos ora menos ta haci cu e posibilidad pa e restaurantnan aki por catalisa nan clientenan y brinda nan servicio, a bira menos. Esaki ta afecta ainda mas e sector aki, seriamente golpia debi na e Covid crisis. Esaki tabata e motibo di un grupo di restaurant nan mal contento y accion.

ATA

Directora di ATA, Ronella Tjin Asjoe-Croes a declara na Bon Dia Aruba cu den nan rol den e crisis team nacional, ATA ta esun cu ta den contacto cu Aruba Food & Beverage Association (AF&BA). El a aclaria cu e asociacion aki no tabata parti di e protesta di diasabra anochi. Mas bien e tabata un protesta di un grupo di restaurant den e area di Palm Beach principalmente.

Como ATA nan tin comprension pa e introduccion di e medidanan, pero tambe pa esunnan cu ta wordo afecta pa causa di e medidanan. Sinembargo e tipo di medida temporario aki ta wordo evalua regularmente.

Tjin Asjoe-Croes mes tabata den contacto cu e asociacion aki. El a wordo informa di kico algun operador tin como intencion. Tambe directora di ATA tabatin contact cu gobierno tambe, y tin un compromiso pa reuni awe. Aunke esaki no a kita cu e grupo di restaurant a sigui cu nan accion di protesta.

Tjin Asjoe-Croes ta clarifica cu a pesar di e protesta aki, no ta asina cu tin un ‘shut down’ na Palm Beach, ya cu tin hopi restaurant cu ta habri. ATA ta monitor manera semper e rednan social. Pues como ATA nan ta considera nan deber pa e turistanan keda bon informa di e panorama aki, y tambe nan ta intermedia den cualkier situacion cu ta wordo presenta.

Pa ATA e situacion aki ta uno dificil. Den e seno di crisis team, ATA ta boga hopi biaha pa trece e balansa entre tur e medidanan y di otro banda, e hecho cu economia mester sigui draai. Sinembargo nos comunidad mester compronde cu si pais Aruba no tin e situacion di Covid bao control, e ta bay impacta economia mucho mas pisa. “Manera mi ta bisa, mester baha e casonan pa turismo por sigui bay. Si nos no baha e casonan, e ta bay impacta nos tur,” segun Tjin Asjoe-Croes.

Impacto

Recientemente Sr. Jan van Nes di AF&BA a referi cu actualmente di alrededor di 400 restaurant cu ta miembro di nan asociacion, 100 di nan so ta den operacion. Nan ta pronostica cu si e situacion ta sigui manera e ta bayendo, y si nan no ta sigui haya e ayudonan for di gobierno, entre otro e subsidio di salario, nan ta premira cu 50 restaurant lo cera pa fin di september. Y si e situacion lo sigui mesun cos, e resto lo cera pa fin di october. Mientras cu e 300 restaurantnan cu no a habri ainda ta den un incertidumbre, si nan ta habri si of no. Practicamente e sector importante aki di nos industria turistico lo somenta.

Tjin Asjoe-Croes ta mira e situacion aki hopi preocupante. Y mirando e cifranan di bishitantenan, un situacion asina tabata di spera tambe. Na luna di juli y augustus, Aruba su turismo no a yega ni un 20% di cada luna di locual nos tabata custumbra di haya normalmente. Ainda nos tin un 80% di e negoshinan cu no ta na nivel cu tabata. “Sin yudansa y cu yudansa hopi no ta bay sobrevivi,” el a bisa.

P’esey directora di ATA ta haya importante e balansa entre e yudansa ey, pero tambe nos tin cu acelera turismo su recuperacion. Pa logra esaki nos tin cu tene, entre otro, e aumento di caso di Covid bao control. Tjin Asjoe-Croes ta kere cu nos por acelera e recuperacion di turismo, principalmente den lunanan di november y december. E ta kere cu tin espacio pa haci’e, aunke tin cancelacion, pero tin demanda y tin oportunidadnan tambe.

Tambe el a referi si ta parti di e demanda aki, e sugerencia cu ATA a haci na e cluster medico pa evalua si por inclui otro estadonan cu por sali for di e hot zone di Covid na Merca. El a bisa cu nan a caba di revisa e lista aki y entrante 15 di september e lista a wordo cambia, esaki ta riba: www.aruba.com

Riba e lista a bin cu cierto cambio den cierto estado cu a sali for di e hot zone, pero e lista no a bira mucho mas corto, pues un estado menos. Pero conhuntamente cu e cluster medico, ATA ta evaluando diferente otro pasonan pa asina pusha den un forma safe nos industria turistico meymey di e pandemia aki.

 

 

 

 

 

LEAVE A REPLY

Please enter your comment!
Please enter your name here