(AFP) – Decenas di hacker a localisa 45 mucha di Ucrania cu a deporta pa Rusia durante un ‘hackathon’ investigativo ‘open-source’ organisa pa Union Europeo su agencia di aplicacion di ley Europol, el a bisa dialuna.
Despues di Rusia su invasion di Ucrania den februari 2022, cantidad di muchanan di Ucrania – casi 20.000 segun Kyiv – a keda obliga di reloca pa Rusia.
E problema ta sumamente sensitivo na Ucrania y ta keda central na cada ronda nobo di negociacion pa un posible acuerdo di paz entre Kyiv y Moscu.
E esfuerso di Europol a mira 40 investigador di 18 pais reuni na Den Haag pa dos dia siman pasa pa usa informacion publicamente disponible como OSINT (open-source intelligence) pa localisa algun di e muchanan.
“En total, informacion tocante 45 mucha a keda descubri y comparti cu autoridadnan di Ucrania pa asisti nan investigacionnan andando,” Europol a bisa den un declaracion. “Durante a hackathon aki, investigadornan a depende riba varios herment digital pa localisa e paradero di e muchanan,” el a bisa.
“Algun di e muchanan aki a keda adopta pa nacionalnan Ruso, mientras cu otronan ta den campamento di re-educacion of hospitalnan psikiatrico.”
Un comision di investigacion internacional di Nacionnan Uni a acusa Moscu di comete “Crimen contra humanidad” pa medio di deporta miles di mucha di Ucrania pa Rusia y stroba nan regreso.
Rusia ta mantene cu el a transferi muchanan di Ucrania for di areanan captura pa nan propio seguridad y ta prepara pa regresa nan na nan famia bao e condicionnan cu e considera apropia.
Corte Criminal Internacional (ICC) a emiti orden di aresto pa President Ruso Vladimir Putin y Maria Lvova-Belova, e Comisario Ruso pa Derecho di Muchanan, pa supuesto crimennan di guera cu ta involucra e deportacion ilegal y transferencia di muchanan for di areanan ocupa na Ucrania na e federacion Ruso.
