Loke ta revela den e documental ‘This is Paris’, cual a debuta ayera gratis riba canal di YouTube di Hilton, ta cu e muhe hoben, ultra glamoroso cu voz di baby kende su comentario standard tabata ‘that’s hot’ tabata un caricatura fabrica no solamente pa fama, sino tambe pa proteccion propio.

Hilton ta bisa cu den su adolescencia el a interesa den escena nocturno y lo sali di cas sin permiso bay club, mientras su famia tabata biba den e hotel Waldorf Astoria na New York. Su mayornan exaspera a mand’e na varios programa pa ‘drech’e’.

Cu su 17 aña, Hilton finalmente a bay na locual e ta describi como ‘lo pio di lo pio’, Provo Canyon School na Utah. “Esey ta e unico luga unda ta imposibel pa huy. Pues basicamente ta e luga di cual ta papia na tur otro luga bisando, ‘si bo huy of bo haci malo, bo lo wordo manda na Provo’”, Hilton a bisa.

El a bisa cu na Provo, unda el a keda pa 11 luna, el a bira victima di abuso fisico y mental, personal tabata batie, fors’e pa bebe pildo desconoci, mir’e mientras e tabata baña y mand’e den isolacion sin paña como castigo.

Paris, di 39 aña di edad ta bisa cu e trato tabata asina ‘traumatisante’ cu el a sufri pesadiya y insomnio pa añanan.

Hilton ta bisa cu ora el a bay di acuerdo pa ta e tema di ‘This is Paris’ no tabata su intencion pa papia di abusonan den pasado, pero el a habri mientras el a bira mas comfortabel cu e director, Alexandra Dean.

Hilton ta bisa cu mientras e tabata na Provo el a dicidi cu e tabata kier tin control completo di su bida y su imagen, nificando cu e nunca lo bisa kico a pasa cune. E tambe tabata kier ta hopi, hopi rico. “Mi a mira exito como libertad y djis a imagina e bida glamoroso aki… mi a haci tur sorto di plan di kico mi tabata kier ta. Y mi tabata djis worry tocante ta exitoso y independiente.”

Pa un persona critica pa ta famoso sin motibo, Hilton a construi un compania multibiyonario rond di su imagen. E tin tiendanan den Medio Oriente y Asia, ta un DJ exitoso y a lansa 27 perfume, entre otro producto.

“A resulta cu henter e mashin ey, tur e atencion cu el a ricibi, e paparazzi, insta-fama, tur tabata un creacion di e mucha muhe traumatisa aki, purbando di logra sali di e buraco den cual e tabata”, Dean a bisa. “El a atrae tur esey. Den algun forma el a crea tur esey. Loke mi kier pa hende sa ta cu nan mester dun’e credito pa ta inmensamente innovativo, pero tambe compronde cu loke nan a mira no tabata e persona, sino e escudo cu el a construi pa protege su mes.”

Hilton ta bisa cu desde cu el a papia di loke a pasa na Provo – cu desde 2010 tin doñonan y maneho nobo – e ta sinti liber. Awo e ta drumi den anochi y no tin pesadiya mas. Ademas e ta sinti cu e ta contento y den un relacion saludabel cu comerciante Carter Reum.

Su bida a baha velocidad den ultimo seis luna pa motibo di pandemia, y e no ta biahando pa trabao mas. Hilton ta bisa cu e ta gust’e asina, y tin plan pa continua di ta mas cuidadoso tocante sali di cas. “Mi ta bayendo den proximo etapa di mi bida”, el a bisa.

Ademas e tin speransa cu papiando contra programanan manera Provo lo por descurasha mayornan di manda nan yiunan na situacionnan similar. “Ami nunca lo recomenda esey na ningun famia, nunca, pasobra mi ta kere cu ta djis causa mas drama y mas problema cu un persona lo por tin.” Awo e ta parti di e movemento Breaking Code Silence, un red dedica na crea consciencia tocante e ‘industria di hoben problematico’.

“Ta gaña y manipula e mayornan, y ta bisa nan henter un storia diferente”, el a bisa. “Mi ta kere ta importante pa haci bo investigacion.”

LEAVE A REPLY

Please enter your comment!
Please enter your name here