Un investigacion di Nacionnan Uni encuanto violacion di derecho humano na Haiti, den e caso di un masacre den un bario pober di Port-au-Prince na november aña pasa, a resulta den un cuestionamento di e papel cu autoridadnan gubernamental a hunga. Di mesun manera di cuerpo policial cu a haya training special dor di Nacionnan Uni pa asumi e papel di e forsa local cu ta mantene ordo di Nacionnan Uni cu ta varios aña na e pais.

E investigacion tabata encuanto e sucedido durante e reino di teror cu a existi durante dos dia den e bario margina La Saline na Port-au-Prince, unda a confirma por lo menos 26 persona mata, cierto di nan cu hacha o machete, mayoria cu tiro di arma di candela, y nan curpanan hiba den garetia y benta afo na un luga desconoci. Investigadonan a bisa cu a keda por lo menos 12 persona sin paradero conoci.

E masacre, segun Nacionnan Uni, “ta lanta hopi preocupacion tocante abuso di derecho humano contra residente di bario La Saline y e supuesto envolvimento di Polis Nacional di Haiti y otro funcionario di estado.” E victimanan tabata varia di edad entre 10 luna te 72 aña.

Di banda di gobierno di Haiti tin cierto reserva encuanto e conclusionnan di e informe pa loke ta e cifranan di victima. Hefe di Polis Nacional Ralph Stanley Jean Brice, a bisa cu no tabatin oficial policial envolvi den e masacre. Brice a conta Miami Herald cu tabatin dos anterior oficial di polis involucra y no tabatin unidad policial presente. “Tabata anochi y den un blackout y polis no kier a drenta e bario. Ademas nos no tabatin suficiente hende o ekipo pa para e incidente.”

E informe pidi pa Conseho di Siguridad di Nacionnan Uni, ta yega mientras Nacionnan Uni ta preparando pa sali di Haiti, despues di 15 aña di mantene orden den e pais, mientras e pais ta experimentando un aumento den violencia di gang y un crisis politico.

 

LEAVE A REPLY

Please enter your comment!
Please enter your name here