Hoben Arubano pega na Venezuela ta conta su storia

Un hoben Arubano cu tabata pega na Venezuela ta conta Bon Dia Aruba e storia di su vakantie recien cu a dal un bolter inespera ora autoridadnan Venezolano a dicidi di cera fronteranan cu islanan ABC.

Nos tabatin contacto caba cu e hoben David Carache, studiante na Universidad di Aruba desde cu presidente di nos pais bisiña Nicolás Maduro a anuncia cu lo stop comunicacion maritimo y aereo entre su pais y e islanan ABC. T’asina cu den e momentonan cu e hoben tabatin acceso na internet e tabata core informa Bon Dia Aruba riba su situacion actual y nos di nos banda tambe tabata manda cualkier acontecimento den su direccion.

Despues cu sr. Carache a yega bek na nos isla riba diahuebs nos a sinta hunto cu e hoben pa asina papia di su experiencia y henter e asunto humanitario. Y tambe politico di loke ta pasando actualmente na nos pais bisiña y con esaki lo por afecta nos.

Pa prome, e hoben ora di a tende riba television Venezolano cu e presidente di e pais lo ta considerando cera e fronteranan cu islanan ABC, e no a kere cu lo e bay seriamente haci esaki. Pues ora cu el a haya sa cu e medida a cay oficialmente ya e tabata wardando na aeropuerto pa por bin Aruba bek. Pero despues di a refleha e studiante a expresa cu esaki lo ta relaciona cu e dicho Venezolano cu ta bisa ‘es mas culpable el que compra que el que vende’… Esta e punto cu e presidente a trece dilanti di contrabanda cu ta drenta legalmente na Aruba.

Pega na airport

E hoben ta conta con e tabatin solamente 60.000 bolivares den su man- cual ta suficiente pa un snack of algo chikito pa come- na momento cu a realisa cu e no por bin su pais bek. Ademas e no tabatin acceso na un telefon cu lo por haci yamada na Venezuela y e aeropuerto no tabatin internet.

E cantidad di placa ]no tabata suficiente tampoco pa tuma un taxi bek na cas di su famia. Pero despues di a haya un luga cu ta fia telefonnan barata pa minuut, el a logra regla pa un hende bin busk’e.

Regla otro manera di yega Aruba bek tabata dificil

Ora e studiante a reuni cu su famia, nan a purba tur manera pa asina yega Aruba bek. Sea via Republica Dominicana, Panama of Colombia. E opcion di Panama lo no ta posibel pasobra e hoben mes tin paspoort Hulandes pero su mayornan no tin esaki, e ta conta nos. Pues pasobra Panama awo ta exigi visa pa ciudadanonan Venezolano esaki a haci esaki dificil.

Alabes e aspecto financiero tabata dificil pasobra despues di a caba nan vakantie e fondonan a casi caba completamente. Ademas agencianan di biahe cu lo por a regla un manera pa e famia yega bek Aruba tabata acepta credit card di afo solamente pa biahenan internacional.

Na cierto momento te hasta a considera pa bay cu bus te na Bogota, algo cu lo tuma un par di dia. Pero el a expresa cu e ta hopi agradecido pa e ayudo cu tanto gobierno di Aruba como gobierno Hulandes a brinda pa por yega bek cas. “Mi a sinti manera ta importante pa nan pa nan hendenan yega bek cas.” E hoben particularmente ta haya cu su mayornan a bay den un experiencia dificil unda cu nan pais di origen kier secuestra nan, mientras nan pais adoptivo si ta worry pa busca nan bek.

Aspecto di siguridad

E hoben a expresa cu pa hopi tempo su famia ta bay frecuentemente pa pasa vakantie na Venezuela, te hasta 2 biaha pa aña. Pero e semper a haya poco miedo pa pasa e vakantie na Venezuela. Sr. Carache ta splica cu semper mester keda alerta y no uza telefon den publico (pero na cas tambe mester tene cuidou). Esaki tabata sumamente diferente na situacion na Aruba unda ta hopi mas sigur y no tin mucho peliger te hasta pa cana den publico durante anochi. Esaki compara por ehempel na Caracas unda hende no ta sali bay den anochi mes, cayanan ta keda bashi.

Pero esaki te hasta ta bay mas leu cu uza celular, segun sr. Carache. E hoben a conta nos con un dia ora tabata haci calor na Punto Fijo e kier a bisti short pa sali den dia. Pero un conoci cu ta biba na Venezuela a bis’e pa no haci esaki. ‘Nos no ta bisti cashon cortico ki nan’, e persona a conta sr. Carache. E hoben a haya esaki straño pero mas cu claro ora el a sali, el a nota cu tur hende tabata bisti cashon largo. Te hasta por medio di bisti cashon cortico lo e por a hala mas atencion na su persona cu ta necesario.

E ta conta tambe con na el a hera wordo asalta pa atracadonan cu a drenta su bisiña su cas pa horta tur nan pertenencianan. “Mi no tabata ni 5 meter leu ora mi a tende cu hende a drenta mi bisiña su cas. Na e momento ey mi a paga mi telefon y djey despues di un rato mi a haya sa cu un grupo di hende a drenta mi bisiña su cas, mara nan na muraya y punta nan cu scopet. Nan a hiba tur cos: television, cuminda, celular, joyas, pampers, tur cos.”

E studiante ta bisa posiblemente ta su famia mes nan lo a busca pasobra hopi di e delincuentenan ta buscando persona cu dollarnan. Esaki ta pasobra segun sr. Carache pa cada 10 persona na Venezuela, 6 di nan tin famia cu a emigra. Y hopi biaha e famianan aki ta manda placa via via pa nan famia por sobrevivi.

Mi ta haya horibel cu presidente Maduro kier secuestra su propio hendenan. E ta un echo cu tur hoben di e pais -si nan no a sali caba- kier emigra bay exterior.” E crisis actual na nos pais bisiña ta trece cu ne cu hopi luganan ta acepta cash solamente, cual dia pa dia ta bira mas dificil pa carga pa via di e inflacion cu ta for di control na Venezuela.

Documentonan di biahe Venezolano dificil pa obtene

Segun e hoben, algo cu tambe ta hunga un rol den henter e asunto aki ta cu pa hopi ciudadano Venezolano e ta casi imposibel pa renoba nan paspoort. Esaki kiermen cu den cierto casonan lo ta dificil pa bay riba biahenan. E ta splica cu e argumento cu e autoridadnan ta uza ta cu ‘no tin suficiente material’. Pues ta birando practica normal cu no ta sacando mas paspoortnan, segun e hoben. Pa por renoba esaki por pone un tipo di sticker na e paspoort venci cu nan ta yama un ‘proroga’ y cu esaki e paspoort ta keda extendi cu 2 aña mas. Pero e gastonan relaciona cu esaki te hasta ta mas cu un paspoort nobo.

Por ehempel na consulado general di Venezuela aki na Aruba segun e hoben, e prijs ta 80 dollar pa un paspoort nobo mientras e ta 180 dollar pa un proroga. Un familiar di e hoben mes ya caba ta wardando un aña pa un paspoort nobo. “Pero nunca nan no a honra nos peticion. El a wordo paga y tur cos. Nos por a bay Venezuela solamente pasobra el a pidi un famia di nos cu ta traha na SAIME (Servicio Administrativo de Identificación Migración y Extranjería) ayudo cu e tramite pa haya e proroga.”

Nos lo purba tuma contacto cu Consulado General pa asina haya sa mas tocante e aspecto aki.

You May Also Like

Elton Lioe A Tjam: ‘Maneho ambiental no a yuda Aruba’

E problema ambiental ta grandi y maneho di medio ambiente ta wordo considera como ...

Ley di parke marino y 17 area protegi na Conseho Consultativo

E ley pa proteha 17 areanan, cual originalmente tabata 16, actualmente ta na Conseho ...

Parlamento Hubenil: ‘Nos kier desaroya un comunidad unda hoben no tin berguensa pa expresa nan mes’

Durante un entrevista cu representantenan di Parlamento Hubenil na nan oficina situa na YMCA ...

Despues di basta aña a reforsa cuerpo di duana cu 20 miembro nobo

Ayera mainta a wordo anuncia cu cuerpo di aduana ta reforsa cu un grupo ...

mediadoer protocol aeropuerto.JPG

Segun Mediador di Gobierno, sr. Anselmo Pontilius Firma di protocol a trece pas laboral den aeropuerto

Despues di 9 luna di negociacion entre sindicato STA y gerencia di aeropuerto, esta ...

‘Ora tin emocion halto y tension den comunidad ta importante pa refleha un momento’

Awe dia 21 di september e Organisacion Cultural, Educacional y Cientifico di Nacionnan Uni ...