(AP) — Un hoben di 18 aña di edad ta na caminda pa bira e persona mas hoben den espacio, despegando cu un pionero di aviacion kende lo bira esun di mas bieu, cu 82 aña di edad.
Blue Origin a anuncia diahuebs cu na luga di e ganador di un subasta di $28 miyon bayendo cu fundador Jeff Bezos diamars, e yiu Hulandes di otro persona cu a participa den e subasta lo ta abordo. E compania a bisa cu Oliver Daemen lo ta e prome cliente paga, pero no a revela e prijs di su ticket. Pero un vocero di e famia a bisa cu lo ta considerablemente menos cu e ganador di e subasta.
Daemen a bay cu e di cuatro y ultimo asiento riba e capsula espacial despues cu un ganador di subasta a retira pa problema cu su schedule. E oferta a bin den un yamada sorpresa for di Blue Origin siman pasa, el a bisa. “Ta increiblemente cool!”, Daemen a bisa den un declaracion. “E vuelo pa y den espacio ta dura apenas 10 minuut, pero mi sa caba cu esakinan lo ta e 10 minuut mas special di mi bida.”
El a agrega den un video riba noticiero Hulandes, RTL: “Mi ta asina emociona pa experiencia gravedad cero y mira mundo for di ariba.”
Tambe riba e prome lansamento di Blue Origin cu pasahero: Ruman di Bezos, y Wally Funk, un di 13 piloto femenino cu a pasa door di e mesun testnan na añanan 1960 cu astronautanan den Mercury 7 di NASA, pero nunca a bay den espacio pasobra solamente tabata permiti homber.
E tour lo sali for di West Texas riba un raket New Shepard pa un vuelo di 10 minuut. E fundador di Amazon lo bira e segundo persona pa bay den su propio raket den espacio, 9 dia despues cu Richard Branson di Virgin Galactic.
Daemen a tuma un aña liber despues di gradua scol secundario aña pasa pa obtene su licencia di piloto priva. E ta bay atende Universidad di Utrecht na Hulanda na september. Su tata ta Joes Daemen, fundador y CEO di Somerset Capital Partners, un compania di private equity for di Oisterwijk, Hulanda.
Daemen ya a ricibi bon conseho di biahe espacial di astronauta Hulandes y dobel biahero espacial Andre Kuipers. Segun e declaracion, Kuipers a bis’e pa ‘no comete e eror clasico di saca potret den e tiki tempo cu e ta ariba, sino disfruta completamente e bista di nos bunita planeta’.
