Ayera Museo di Industria cu a habri un par di luna pasa na San Nicolas tabata masha bishita den cuadro di Dia di Betico. Manager di e museo aki, Rosetna Martinus a bisa cu e ta contento ya cu gran mayoria di e bishitante tabata mucha.

“Esey ta loke nos kier, pa nan bin conoce e historia y cultura di nan isla di Aruba.” E ta agrega cu e publico ta sali contento despues di bishita e museo aki cu a keda inaugura na luna di september ultimo. E ta haya cu e museo ta duna bo un inspiracion ya cu bo ta bin conoce hopi cos di evolucion industrial na Aruba. For di unda nos a cuminsa y te aworaki cu e industria turistico y tin ainda un capitulo habri pa esun green. “E historia cu tambe bo ta scucha, tur ta inspira bo. Y na momento cu bo ta sali, bo ta sinti bo orguyoso, pasobra bo sa di unda nos a cuminsa te caminda cu nos ta aworaki.΅

Cuater luna pasa e museo aki a tene su apertura oficial riba dia 12 di september ultimo, y regularmente nan ta hayando hopi bishitante. No solamente ta existi un interes grandi di nos hendenan local; pero tambe turista cu ta keda encanta cu e joya di museo aki cu a bira un atractivo den pleno curason di San Nicolas. Sra. Martinus a bisa cu esaki ta un satisfaccion grandi pa nan “ya cu e museo ta dunando su frutanan”. Nan ta bin hayando sugerencia specialmente pa nan sigui brinda e tournan den e museo specialmente pa e hobennan.

E luna aki nan a cuminsa bishita diferente institucion educativo, specialmente e scolnan na San Nicolas, invitado e maestronan prome pa nan bin wak y despues bin cu e studiantenan pa nan bin haci e tour. No solamente e meta tras di dje ta esun di wak e museo sino tambe di realisa actividadnan na e museo mes cu ta yuda nan pa hiba e informacion bek na cas y tambe cerca nan pa nan por desaroya esaki.

Promove San Nicolas
E ta haya cu como manager ta un desafio grandi pe pa maneha un museo asina importante y atractivo. Aunke e ta mustra hopi jong, e ta un persona cu hopi experiencia riba tereno di turismo, y marketing. Esaki ta yud’e hopi pa asina bin cu ideanan con pa promove e museo. Tambe e ta forma parti di diferente organisacion social, y aunke e no ta directamente di San Nicolas, e tin un cariño grandi pa e districto aki y su pueblo, ya cu mayor a wordo lanta na San Nicolas. E ta orguyoso y gradicido ya cu hobennan di San Nicolas mes ta comprometi cu e museo aki boluntariamente. Nan ta yuda den tur actividad cu e museo ta organisa y algun di nan miembro di YMCA.

E ta probecha pa extende un invitacion pa henter pueblo di Aruba pa bishita e museo caminda nan lo bay haya hopi informacion di pasado, presente y tambe pa nos futuro. Nan ta haci uzo di material audio-visual, pues nan no solamente ta wak artefacto, pero historia y biografia di hendenan cu a forma parti di diferente industria desaroya riba  nos isla. E ta haya importante pa nos como mayor stimula nos hobennan pa nan siña di nan pasado. “Pa motibo di sa di unda bo bini bo por sigui bay dilanti y bo sa unda bo ta bay”, sra. Martinus a bisa.

Ya caba el a anuncia cu riba18 di Maart dia nacional di Himno y Bandera tambe nan lo ta habri pa publico, y tambe riba prome diadomingo di luna  nan lo participa den e experiencia na San Nicolas hunto cu mas galerianan y restaurantnan pa asina nan disfruta di loke e districto rico den cultura aki tin di ofrece.