(CuraçaoChronicle) – Hunto cu su partnernan, polis a cuminsa enfoca riba crimen subversivo den industria automobilistico. Siman pasa, a haci un bishita na un scrap yard y dos compania cu ta haci comercio cu auto usa y piesanan.

Tabata trata di companianan riba Santa Rosaweg, Pater Eeuwensweg, y area di Kanga. E accion a tuma lugar bao bandera di e Action Center Undermining Curaçao (ACOC), un colaboracion entre partnernan (di gobierno) involucra den combati crimen subversivo.

Participando tabata ministerio di Desaroyo Economico, Stichting Bureau Belastingadviseurs, Aduana, ministerio di Desaroyo Social, Labor y Bienestar, Banco di Seguro Social, Unidad di Inteligencia Financiero di Corsou, y Polis.

 

Vulnerabilidad

ACOC a scoge e industria automobilistico como un di e temanan central riba cual cooperacion ta tuma lugar. Segun e organisacion, esaki tin di haci cu e vulnerabilidad di e sector. Criminalnan por usa e compra di auto pa laba placa. Pero tambe tin otro forma di crimen di vehiculo, manera comercio ilegal di auto, hortamento di auto, destruccion di auto pa parti y number di chassis.

ACOC ta bay bishita mas compania den industria automobilistico den proximo periodo. E checkeonan aki tambe ta bay tin meta pa aumenta conscientisacion tocante e peliger y riesgonan cu ta presenta na momento di traha cu criminalnan. Tambe ta bay duna informacion riba con pa reconoce señalnan di actonan ilegal.

Segun Ministerio Publico, undermining (socavamento) ta un tema dificil pasobra hopi biaha e no ta visible. Ciudadano y companianan mester wordo conscientisa riba esaki pa asina por preveni cu – consciente of inconscientemente – ta participa den practicanan criminal, segun OM.

LEAVE A REPLY

Please enter your comment!
Please enter your name here