Durante un presentacion cu Eugene Maduro di DVG a ofrece awe atardi den un conferencia di prensa, el a splica tocante con e virus a plama den region di Caribe y estadisticonan di casonan positivo na Aruba.

Maduro a trece dilanti cu Republica Dominicana ta e pais den region Caribense cu tin mas casonan activo actualmente, sigui pa Cuba, Martinique, Guadeloupe, Trinidad and Tobago y Aruba. Santo Domingo tambe ta esun cu tin mas morto registra te e momentonan aki.

Di loke ta trata Aruba, Maduro a informa cu a test 737 persona caba pa loke ta trata COVID-19 y esaki ta encera cu a test mas hende muhe compara cu hende homber, cu un cifra di 60% hende muhe y 40% hende homber. Di esaki, el a menciona cu 7,5% a sali positivo, ekivalente pa 55 persona.

E sintomanan cu e personanan aki a presenta, el a bisa cu ta tosamento, keintura, dificultad pa hala rosea, dolor di garganta, dolor di cabes, asina como otro tipo di malestar respiratorio.

Otro di e sintomanan cu e persona aki ta presenta ta yama ‘Anosmia’. Esaki ta nifica cu e persona ta perde smaak of holo, pero e ta conoci pa un infeccion viral cu ta respiratorio y cu por sosode cu cualkier infeccion viral.

Tambe el a duna di conoce cu 27%, aproximadamente 3 di cada 10 persona cu a wordo diagnostica cu e virus aki, tin un historia di biahe specificamente for di New York of Miami na Merca.

E grupo cu ta mas afecta ta esun entre 25 pa 40 aña di edad, pa motibo cu e ta wordo considera como un grupo mas reproductivo y mas mobil den comunidad.

Di e casonan confirma, Maduro a bisa cu 26% ta trahadonan di area di cuido, 28% ta traha den area di hospitalidad y 46% ta otro tipo di ocupacion.

 

 

LEAVE A REPLY

Please enter your comment!
Please enter your name here