Dia 31 di maart ultimo parlamentarionan di partido MEP y RED a entrega na parlamento un proyecto di ley, cu ta propone un reduccion temporal di salario y otro compensacion, relaciona cu e situacion na nos pais a consecuencia di e actual crisis di coronavirus.

Den e consideracion ta bisa cu e virus COVID-19 ta haciendo daño significante na economia di Aruba, y aportacion na caha di pais Aruba a baha sustancialmente, y cu gobierno mester baha su propio gastonan. Esaki a conduci na e decision pa tuma e medida di baha e salario di esnan den funcion politico temporalmente.

E reduccion contempla den articulo 1 ta bisa cu, desviando di articulo 4 di Landsverordening voorzieningen politieke ambtsdragers (AB 2010 no. 90) e remuneracion di funcionarionan politico ta ser reduci cu 10%. E articulo ta referi na e salario basico di e politiconan.

Articulo 2 ta bisa cu, desviando di e mencionado ley, den aña 2020 no ta duna ningun compensacion extraordinario (bijzondere uitkering) na funcionario politico. E articulo aki ta referi na e ‘bijzondere uitkering’ cu e funcionario ta haya pa cada luna di calender cu e persona a funciona como tal.

Ambos medida ta conta pa ministro, parlamentario y ministro plenipotenciario. Un calculo rapido ta indica cu esaki por significa un austerisacion di alrededor di Afl. 500.000.

Durante tratamento di presupuesto 2020 un amienda di parlamentario Alan Howell (POR), pa duna Afl. 1000,- di e salario di politico, a keda rechasa pa e mayoria di coalicion. Varios di nan a expresa caba cu nan lo a bin cu nan propio gesto pa cu e situacion den cual Aruba su economia y comunidad ta actualmente. Gobierno a anuncia di bay sinta na mes ainda cu e sindicatonan cu ta representa empleado publico pa consulta nan riba e medidanan cu lo ta na caminda. Na varios ocasion prome ministro Evelyn Wever-Croes a referi na esaki, bisando cu sacrificio mester bin di tur.

LEAVE A REPLY

Please enter your comment!
Please enter your name here