A traves di un potret publica riba rednan social y cu despues tambe Stichting di Educacion Profesional Basico (Stichting EPB) a comparti pa comunidad, a keda informa cu nan alumnonan mester cumpli cu cierto rekisito di bistimento ora nan ta paden di e institucion.

Esaki ta pa motibo cu e mesun potret ta indica cu no ta permiti pa studiantenan mustra nan paña interior (saggy pants) y cu tur carson mester ta bisti na haltura di cintura.

Investigando na internet, redactor di Bon Dia Aruba a haya loke esaki ta nifica y su origen cu na Merca esaki no ta un moda nobo y cu ya caba nan a implementa leynan for di 2012 pa purba di caba cune.

E moda aki a origina na un prizon ora cu e detenidonan no tabatin uniforme adapta na su size, ta p’esey cu tabata obliga di bisti un size mas grandi ademas cu tabata prohibi e uso di faja pa evita cu nan por a usa esey como un arma of como un forma di suicidio, pa e motibo ey e carsonnan tabata cay.

E estilo aki a extende te artistanan di rap y esey por apreci’e den nan videonan di musica, for ‘di e ghetto’ e moda a bay te e ciudadnan y despues rond di mundo a adapt’e.

Pa loke ta trata e institucion, e directiva ta señala cu si e alumno no ta cumpli cu esaki e lo wordo manda na cas pa cambia su carson y ademas e lo ricibi un straf.

“Awor nos tin di bay siña nos muchanan pa no cana ta mustra nan ‘underwear’ na Aruba conoci como ‘joki’, ta tristo cu mester haci esaki…” Erwin Lopez persona cu a publica e potret a señala y tambe a finalisa cu mayornan tin cu yuda nan pa cu esaki, pa motibo cu nan ta kere cu na cas tambe nan ta cana di e mesun manera.

Algun comentarionan door di esaki a wordo treci dilanti den e post na unda e mesun usuarionan di rednan social a bisa cu esaki ta un bon decision y cu mester haci’e na tur scol.