Un astronave na caminda pa Mercurio a bula cerca di Venus ayera, usando e bisiña di Tera pa ahusta su ruta na caminda pa e planeta mas chikito y mas interno di sistema solar.

Lansa casi dos aña pasa, e investigacion Europeo-Hapones BepiColombo a saca un potret blanco cu preto di Venus for di un distancia di 17mil kilometer, cu algun di su propio instrumentonan visibel.

E vuelo cerca di Venus ta e segundo di nuebe asina-yama ‘asistencia di gravedad planetario’ cu e astronave mester pa su biahe di shete aña na Mercurio. E prome, rond di Tera, a tuma luga na april.

Agencia Espacial Europeo (ESA) a describi e mision di 1.3 biyon euro como un di esunnan cu mas reto te awo. E temperaturanan extremo di Mercurio, e forsa intenso di gravedad di solo, y e radiacion solar ta crea condicionnan infernal.

BepiColombo lo haci un vuelo mas cerca Venus y seis cerca di Mercurio mes pa baha velocidad prome cu su yegada na 2025. Unabes e yega, e astronave lo separa den dos, liberando un orbiter Europeo yama Bepi cu lo cay den orbita interno di Mercurio, mientras e otro, Mio, construi pa Agencia di Exploracion Aerospacial Hapones, ta compila data for di un distancia mas lehano.

Ambos investigacion ta diseña pa por anda cu temperaturanan variando entre 430 grado Celsius riba e banda dilanti solo, y -180 grado Celsius den e sombra di Mercurio.

Investigadornan tin speransa cu mision BepiColombo lo yuda nan compronde mas tocante Mercurio, cual ta tiki mas grandi cu Luna di Tera y tin un centro masivo di hero.
E ultimo astronave cu a bishita Mercurio tabata e Messenger di NASA, cu a conclui su mision na 2015 despues di un orbita di cuatro aña. Prome cu esey, Mariner 10 di NASA a bula cerca di e planeta den añanan 1970.

LEAVE A REPLY

Please enter your comment!
Please enter your name here