Ginger ta un mata cu a ser usa pa trata malesanan pa miles di aña. No solo e ta un adicion delicioso den cushina pa su sabor pica y dushi, sino tambe e ta hopi bon pa bo salud.

Aki seis beneficionan di ginger pa salud, y con pa agrega esaki na bo dieta.

1. Ginger tin antioxidantenan, cu ta preveni daño na cel
Raiz di ginger tin un di e nivelnan mas halto di antioxidante compara cu otro cuminda, segun Chika Anekwe, MD, MPH, un dokter di medicina di obesidad na Hospital General di Massachusetts na Boston. Solamente pomegranate y otro berry rico den antioxidante ta surpasa ginger.

Antioxidantenan ta preveni stress oxidativo, un proceso asocia cu malesanan manera cancer, diabetes y atake celebral. Stress oxidativo ta tuma luga na momento cu tin demasiado free radicals – moleculenan naturalmente produci den procesonan metabolico – den curpa. Antioxidantenan ta stabilisa free radicals y ta preveni stress oxidativo, pues protegiendo asina e curpa contra malesa.

Un estudio chikito na 2017 a test e efectonan antioxidante di ginger den pashent di cancer ricibiendo kimoterapia. Esnan cu a ricibi un extracto di ginger diario tabatin nivelnan mas halto di antioxidante y nivelnan mas abao di stress oxidativo cu e grupo placebo.

2. Ginger ta actua como anti-inflamatorio
Ginger tambe ta actua como anti-inflamatorio danki na su propiedadnan antioxidante. Un exceso di free radicals por causa inflamacion – e respuesta immuun natural di bo curpa pa obhetonan stranhero dañino.

Tipicamente, inflamacion ta desaparece unabes cu bo curpa repara su mes. Pero ora bo ta experimentando stress oxidativo, esaki por causa inflamacion cronico. Esaki ta causa bo curpa pa daña cel-, tejido- , y organonan saludabel. Inflamacion cronico por conduci na malesa manera atake di curason of dolor cronico manera artritis.

Un estudio grandi na 2001, conduci den pashentnan cu osteoartritis den rudia, a haya cu 63% di esnan cu a bebe ginger dos biaha pa dia pa seis siman a mira reduccion den dolor di rudia pa motibo di inflamacion, compara cu 50% den grupo di control.

3. Ginger ta un tratamento pa nausea
Un di e beneficionan miho estableci di ginger ta pa alivia sintoma di nausea y vomito. Ginger ta contene un componente yama gingerol. Gingerol ta conoci pa mehora motilidad gastrico – e paso di cuminda a traves di e curpa – y suprimi espasmonan muscular. Esaki por yuda calma e stoma y reduci sintoma di nausea y vomito.

Ginger tambe ta un remedi herbal sigur y efectivo pa muhenan na estado cu nausea mainta. Un estudio chikito na 2009 a test e efectividad di capsula di ginger riba muhenan na estado experimentando nausea y vomito. Muhenan na estado kende a bebe 250mg di capsula di ginger pa cuatro dia a experimenta menos nausea y menos sacamento cu muhenan cu a ricibi un placebo.

4. Ginger ta alivia dolor menstrual
Ginger tambe por ta un remedi pa dolornan di menstruacion. Ginger ta suprimi e produccion di kimico cu ta pone bo utero contrae, causando dolor.

Den un estudio di 2015, cientificonan a revisa investigacionnan anterior evaluando e efectonan di ginger riba dolor menstrual, y a conclui cu 750mg pa 2000mg di puiro di ginger por yuda alivia dolor durante e prome tres pa cuatro dia di ciclo menstrual.

5. Ginger por regula nivel di sucu
Tin algun evidencia cu ta sugeri cu ginger por yuda controla nivel di sucu den sanger di persona cu diabetes, door di aumenta absorcion di glucosa den cel muscular sin insulina.

Un estudio chikito den un journal Irani a test e efectonan di ginger den persona cu diabetes tipo 2. Esaki a haya cu bebe 2g pa dia di puiro di ginger a mehora indicadornan di sucu den sanger.

Otro estudio na 2018 a haya cu bebe capsula di ginger a reduci nivelnan di glucose den sanger den muhenan cu diabetes gestacional.

6. Ginger por trata indigestion
Ginger ta stimula enzymnan digestivo responsabel pa move cuminda a traves di e curpa mas rapidamente, loke ta preveni gas. “E ta yuda e curpa kibra gas y saca gas mas efectivamente”, Ankewe ta bisa.

Un estudio chikito na 2008 den un journal Europeo a test e efectonan di ginger riba persona saludabel. Investigadornan a conclui cu bebe tres capsula di 1,200mg di ginger a agilisa bashamento gastrico – e proceso unda cuminda ta bandona e stoma y ta bay den intestino delga – y a curasha mas ‘contraccion antral’, cual ta necesario pa kibra y digeri cuminda.

Con pa añadi ginger na bo dieta
Segun Anekwe, por facilmente incortpora ginger den bo dieta, door di:

Agrega un pida di ginger fresco na awa pa traha te;

  • Agrega ginger fresco corta fini of puiro di ginger den curry of cuminda stoba;
  • Mescla un tiki ginger den bo smoothie;
  • Traha cuki, bolo of pan cu ginger.

Si bo no gusta e smaak di ginger, bo por cumpra capsula di ginger na bo botica preferi. Mientras ginger ta safe, ta miho pa no consumi mas cu un gram di ginger pa dia. De lo contrario por experimenta kimamento di garganta, indigestion of gas.

Pa conclui
Ginger ta un remedio herbal eficiente pa un cantidad di malesa, incluyendo nausea, sacamento, dolor y indigestion, pa motibo di su propiedadnan anti-inflamatorio y antioxidante. Por agrega algun gram di ginger na bo dieta cada dia pa logra e beneficionan pa salud aki di forma sigur.

LEAVE A REPLY

Please enter your comment!
Please enter your name here