Cientificonan Mexicano a confirma cu e mata conoci como Rosa de Castillo (nomber cientifico Purshia plicata) cu ta crece den e inmensidad di e semi desierto di Coahuila ta posee propiedadnan anti-cancerigeno y anti-oxidante.

Especialistanan di Universidad Autonomo di Coahuila a investiga e propiedadnan di e mata extrayendo su componentenan bioactivo, comprobando su potencial anti-oxidante y anti-proliferativo den celnan di cancer cervico-uterino.

E resultadonan di e investigacion, encabesa pa e biologo José Carlos de León, a confirma cu e Rosa di Castilla tin un contenido halto di polifenolico y e presencia di otro componentenan di interes pa e sector industrial farmaceutico y di alimentacion.

“Loke a haci prome tabata realisa algun prueba pa conoce e mata, ya cu no a haci tanto estudio di esaki,” sr. De Leon a conta. Esey tabata necesario pa comproba si e mata tabata un material adecua pa realisa e fermentacion y e posterior extraccion. Ora esey tabata comproba, a realisa diferente fermentacion pa conoce e miho condicionnan di extraccion y e tempo di acumulacion optimal di e substancianan.

“E fermentacion den estado solido ta di considera pasobra e tin un humedad relativamente abao, cu e micro-organismo mester pa por crece, diferente cu e metodo convencional unda awa ta abundante den e proceso”, e specialista ta splica.

“Por a observa cu e tabata un fuente adecua pa e extraccion di e substancianan aki, cu a mustra un bon actividad antioxidante y, tambe a mustra cu ora aplica esaki na celnan di cancer, e ta evita nan proliferacion,” segun e cientifico.

Si e descubrimento di e potencial di e mata Mexicano aki resulta exitoso, lo no ta prome biaha cu cientificonan Mexicano ta skirbi historia. Na 1975 Luis Miramontes Cardenas, un ingeniero kimico Mexicano, a descubri un substancia di un mata medicinal na su pais, conoci como Barbasco, cu a resulta di por influencia e proceso di ovula cerca hende muhe. Esaki a causa un cambio radical pa semper den comportacion di hende na mundo, cu introduccion di e pildo anticonceptivo.