Home Regional Brasil: Muhe ta studia mas, traha mas, y ta gana menos

Brasil: Muhe ta studia mas, traha mas, y ta gana menos

308

Muhe ta traha como promedio tres ora pa siman mas cu hende homber,  combinando trabao paga, trabao domestico y cuido di otro persona. Aunke cu ademas e ta contando cu un miho nivel di educacion, nan ta gana como promedio 76,5% di loke hende homber ta gana.

Esakinan y otro dato mas ta loke a ser divulga ayera pa e Instituto Brasileño di Geografia y Estadistica (IBGE), den su estudio Estadistica di genero: indicadornan social di muhenan di Brasil.

Varios factor ta contribui na e diferencianan entre homber y muhe riba mercado laboral. Na 2016, muhenan tabata dedica como promedio 18 ora semanal na cuido di persona o trabao di cas, 73%  mas di loke e hombernan tabata haci (10,5 ora). Pa IBGE, esaki ta splica parcialmente, cu e proporcion di hende muhe cu trabao part time, te 30 ora pa siman, ta dos biaha mas cu cerca hende homber: 28,2% di hende muhe contra 14,1% di hende homber).

“Pa motibo di e peso di trabao di cas y cuido, hopi hende muhe ta sinti e necesidad di busca trabao cu un orario mas flexibel,” e coordinador di Poblacion y Indicador Social di IBGE, Barbara Cobo, ta splica, añadiendo cu: “hasta cu trabao part time, muhe ta traha mas cu homber.”  “Combinando e oranan di trabao paga cu e oranan di cuido o di trabao di cas, como promedio muhe ta traha 54,4 ora semanal, contra 51,4 di e hombernan.”

Y asina mes cu muhe ta traha mas ora, nan ta ganando menos. A pesar cu e diferencia entre entrada di homber y muhe a disminui den ultimo añanan, na 2016 muhenan ainda tabata haya e ekivalente di 76,5% di e salario di e hombernan. Un combinacion di factor por splica e diferencia ey. Por ehemplo, apenas 37,8% di e puestonan den gerencia ta ocupa pa hende muhe; e diferencia ey ta varia segun edad, di 43,4% di hende muhe den puesto di hefe den e grupo te 29 aña di edad, te 31,3% den e grupo di 60 aña o mas.

Otro aspecto, manera e segregacion ocupacional y e discriminacion di salario di hende muhe riba mercado laboral, por contribui na e diferencia di salario. “Nos ta observa loke nan ta yama e plafon di glas (glass ceiling), Barbara Cobo ta splica. “Muhe tin e scol pa por eherce e funcion, ta logra haci esaki te unda e por den su carera, pero ta topa cu un ‘barera invisibel’ cu ta impedi cu e por alcansa su potencial maximo.” Den e categoria di ocupacion di nivel superior di educacion, e diferencia tabata ainda mas evidente: muhenan ta ricibi 63,4% di e salario promedio di e hombernan na 2016, a pesar di tin mas scol.

Na 2016 e muhenan di 15 pa 17 aña di edad tabatin e nivel di scol adecua pa nan edad den un proporcion di 73,5% den enseñansa secundario, contra 63,2% di hende homber. Esey ta significa cu 36,8% di e hende hombernan tabata atrasa den nan educacion: nan ta keda sinta mas.