Ayera a culmina e di dos buelta di eleccion pa eligi un presidente nobo na Colombia.
Na Aruba un total di 2256 ciudadano Colombiano a bay eherce nan derecho democratico di bay vota na Consulado di Colombia. Mayoria di nan a vota Ivan Duque di partido Centro Democratico kende a haya 1893 voto. Mientras cu e candidato Gustavo Petro di Colombia Humana a haya 331 voto. Sr. Duque di derecha y sr. Petro di izquierda.
For di dia 11 te cu 17 di juni a tuma luga e eleccion aki den e consulado di Colombia na Aruba, situa na Julianastraat 4. For di dialuna te diasabra, 1184 Colombiano a bay vota. Y ayera durante e delaster dia di votacion, 1072 a bay vota. Nan a bay vota den completo ordo y civismo. E biaha aki a wordo registra 110 voto menos compara cu e prome buelta electoral cu a tuma luga entre 21 y 27 di mei ultimo.
Alrededor di 819 mil Colombiano residencia den exterior por a eherce nan derecho democratico den 69 pais. Den eleccion ultimo, Aruba tabata e di 16 paisnan unda e Colombianonan a vota mas den nan sede diplomatico.
