Señorita Jeanique de Palm ta un hoben cu tin un carera exitoso den e mundo di beyesa y farandula. Actualmente, cu su 28 aña di edad, Jeanique tin su propio grupo di baile, e ta organisa tayer- y seminarionan pa hobennan di Aruba y tambe ta preparando pa bay representa Aruba den e certamen internacional Reina Hispanoamericana 2021.

Desde januari Jeanique a cuminsa cu preparacion pa e certamen internacional Reina Hispanoamericana 2021, cu lo tuma luga durante luna di october na Bolivia. Tumando diferente tipo di lesnan pa asina prepara lo miho cu e por, Jeanique ta conta nos cu e preparacionnan ta den full swing y ta bayendo hopi bon.

“Nos a tuma e decision eigenlijk bo por bisa dia 31 di december. Dus e prome siman di 2021 nos a start”, Jeanique ta conta. “Mi a start di biaha cu loke ta gym, cera loke ta bay ta mi team pa yuda mi, mi ta bezig cu les di public speaking, personal branding, makiyahe, les di cabey y pasarela. Dus mi preparacion ta bayendo den full swing y mi tin cu bisa cu tur e lesnan ta wordo duna door di personanan local mes”.

Jeanique lo ta competiendo cu 19 otro candidata di America Latino pa e corona maximo di Reina Hispanoamericana 2021 y lo ta biahando dia 17 di october pa Bolivia. E concurso lo dura dos siman y e anochi final lo ta dia 30 di october.

Cu apenas 3 aña di edad el a participa den su prome certamen di beyesa, Little Miss World Aruba. Esaki tabata e concurso cu a habri e portanan pa Jeanique den e mundo di farandula. Jeanique a baila den diferente grupo di baile pa varios aña y despues cu tempo na 2009 el a dicidi di participa den e certamen Miss Teen Aruba International, caminda el a sali segundo finalista, Miss Teen Flamingo y Miss Teen Model International tambe. Esaki a habri caminda pa su prome concurso internacional.

“Na 2010 mi a haya e oportunidad pa bay representa Aruba afo na certamen Teen Princess of the World, cual a tuma luga na Republica Dominicana. Esey tabata mi prome certamen internacional y entre 15 candidata mi a keda corona como Teen Princess of International y mi a gana Best Costume”, Jeanique ta conta. “Na 2013 mi a competi pa reina grandi di Aruba su carnaval representando grupo Champagne y mi a keda como primera finalista tambe”.

Dos aña pasa Jeanique a lanta su propio grupo di baile, Dazzling Dancers, siñando muchanan chikito di 4 pa 6 aña y di 7 pa 12 aña desaroya nan talento den e mundo di baile. Y aña pasa, durante pandemia, Jeanique a cuminsa cu Beauty Within Me. “Mi tabata kier a haci algo diferente y pensando kico mi por haci, paso semper bo ta haya diferente camp pa mucha, pero bo no ta haya algo cu ta focus pa e adolescentenan”, e ta splica. “Mi a sinta pensa, kico mi por haci cu toch wel e adolescentenan, lo haya leuk y asina mi a bin cu e tema di Beauty Within Me”.

“E meta di Beauty within Me ta pa crea hobennan cu ta sigur di nan mes y hobennan cu ta para pa nan mes sin miedo di enfrenta mundo. E parti mas importante no ta e proyecto solamente, pero si no loke cu bo kier trece cu e proyecto, dus bo kier cu despues di e seminario e muchanan por sinti nan mes sigur, nan por sinti cu nan a siña algo cu lo por yuda nan den nan crecemento personal”, el a agrega.

Jeanique ta conta cu aña pasa e seminario bay hopi bon pa ta su prome biaha y e tabatin un total di 30 hoben di diferente edad, entre 14 pa 19 aña, cu a ricibi charlanan di diferente topico presenta pa hoben profesionalnan di e comunidad di Aruba.

E ta splica cu e aña aki tabata exitoso tambe treciendo dilanti diferente topico manera personal branding, reforsa autoestima y salud mental, un topico hopi importante den comunidad actualmente. “Mi invita un psycholoog y muchanan cu ta pasando door di esey a bin conta nan storianan tambe”.

“Esey ta un topico cu actualmente ta hopi popular y hopi mucha no tin e informacion corecto di esaki, dus mi a haya ta net un bon momento na unda nan por a papia cu un psycholoog, haci nan preguntanan y e psycholoog tambe por a splica nan kico ta loke nan tin cu tene cuenta cune y kico ta e proceso cu nan ta pasando aden aworaki, paso ora bo ta hoben bo ta pasa den diferente cambio y hopi biaha bo mes no ta consciente di esey”, el a splica.

Pa Jeanique e satisfaccion mas grandi ta ora cu e ricibi e comentarionan di e mayornan di e muchanan cu ta participa den su seminario bisando cu di algun of otro forma, e ta haci un impacto positivo den e bida di e hobennan.

“Cu e mayor ta wak e cambio den su yiu, pa mi esey ta mas cu un satisfaccion paso na final di dia, e mayor ta esun cu ta convivi cu su yiu y ta conoce su yiu. Den mi caso ta un siman mi ta convivi cu nan, pero si un mayor mira un cambio den un of dos dia despues di diferente seminario, esey pa mi ta mas cu un satisfaccion”, Jeanique a bisa.