Los di e crisis cu nos ta pasando aden na e momentonan aki, nos no ta custuma pa presta atencion na nos mundo interior. “Mi ta referi cu esaki na nos emocionnan y nos sentimentonan.”

Jurisky Geerman tin un pasion enorme pa bida en general. Su interes di con pa sa con ser humano ta hinca den otro y dicon ‘nos ta haci manera nos ta haci’. E kier a compronde y yuda hende.

Cu esaki den mente, el a cuminsa su carera profesional door di studia biologia medicinal, den cual e tin un masters degree den ciencia specialisa den imunologia. Despues di a haya amplio conocemento di e bida fisico cu biologia medicinal. Tambe el a haci e estudio di ‘bida consciente’ pa amplia su conocemento over di bida mas ainda, pero e ora den e parti ‘no fisico of inmaterial’.

Geerman ta guia hende cu nan desaroyo personal, y ta tuma como punto di comienso e mundo interior di nos mes, esta nos emocion, sentimento, pensamento y instintonan entre otro. E ta haci esaki na un manera amistoso, down to earth, practico, profesional y adapta na e persona su necesidadnan personal.

“Por ehempel, esaki, mientras cu e aspectonan aki entre otro aspectonan di nos interior (nos p’aden), tin hopi efecto riba con nos ta comporta (actua, haci) den nos bida diario, y cual ta mustra di ta manera ‘magnified’ awor den temporada di crisis”, e ta splica.

Pa e motibo aki, e kier toca e tema di emocionnan y nan efecto riba nos den e articulo aki, cu enfoke riba e emocion miedo, aunke cu tur emocion ta importante. E ta spera di por inspira y conscientisa esnan cu ta lesa over di esaki.

 

“Nos ta pasando den temponan nunca antes biba. Door di esaki nos no sa eigenlijk con pa haci den e momentonan aki, pasobra nos djis no tin experiencia cu cosnan manera un pandemia y crisis di e magnitud aki”, e ta expresa.

Hunto cu esaki, e ta bisa cu nos no sa eigenlijk tampoco con e futuro lo bay mustra mas. E realidad ta cu prome cu e pandemia tampoco eigenlijk e futuro tabata predecibel, pero pa motibo di nos comodidadnan, e cosnan cu ser humano ta custuma cune, nos structuranan, nos tawata tin e ilusion cu e futuro ta predecible ‘y na esaki nos tawata wanta cu nos ta consciente di esaki of no’.

“Algun di nos tabatin e futuro mas positivo den su mente, y algun kisas mas negativo. Con cu ta, awor hopi, si no ta tur, nos structuranan a wordo kibra. Aworaki nos ta ser confronta cu un otro realidad cu prome y esaki ta trece puro insiguridad cune. Nos djis sa cu nos mester ‘flatten un curve’ (y kisas ni esey nos por compronde bon kico ta wordo bisa cune) y nos ta haciendo lo posible pa esaki ta un realidad bou di guia di nos gobierno y autoridadnan (cual no ta tur di nos, cu of sin rason valido, tin echt confianza cune)”, Geerman ta splica.

E ta kere cu ‘nos por bisa si cu den algun luga den nos mes’ nos sa cu e situacion aki ta bay pasa. Pero cuanto tempo e ta bay tuma? Nos no sa tampoco. “Tur esey ta haci cu nos como ser humano,awo ta sinti pa gran parti nervioso y fastioso. Pasobra ser humano ta hopi bon den wanta kico ta bay pasa den futuro ta confortabel den su structuranan sea bon of menos bon pa nos, pero sinembargo confiabel pasobra nos a custuma con cu ta.”

Tambe e ta bisa cu bou di tur e insiguridad aki tin un emocion hopi basico cu yama miedo. “Miedo ta algo cu nos no gusta papia di dje y mucho menos, sinti’e. Nos tin manera un miedo (tambe yama resistencia) di e miedo, igual cu nos tin miedo di mayoria di nos otro emocionnan y of sentimentonan (manera dolor, tristesa, rabia).”

Geerman ta bisa cu hende por expresa cu ‘Esey ta cos di…’ of  ‘mi ta confia den Dios, pues mi no tin miedo’. Cada un di e expresionnan aki por ta ‘mi no ta bisa cu semper e ta asina, pero por ta’ ehempel di expresionnan unda cu un persona ta nengando e emocion y pues no ta presta atencion na kico e ta eigenlijk sintiendo, of ta pone eynan pa e bay sinti (pues no a wordo sinti ainda, pero e ta manera wardando pa bo acept’e).

Jurisky Geerman su practica yama Inner Work Aruba, situa na Santa Cruz Esaki lo ta e prome edicion di tres parti cu Geerman kier pa persona compronde nan mes den tempo di crisis.