Un maestro di kleuter na Florida a trece su les virtual na un nivel mas halto dialuna, na momento cu icono di musica rock, Jon Bon Jovi a aparece durante un les tocante bida durante cuarentena pa coronavirus.
Luna pasa, e cantante ganado di Grammy a revela un version incompleto di ‘Do What You Can’, cual ta un balada tocante e bataya di e nacion pa contene e virus, y a pidi su fanaticonan pa entrega versonan pa yuda completa e cantica, segun Palm Beach Post.
Michael Bonick, un maestro na Marsh Pointe Elementary School na Palm Beach Gardens y fanatico de por vida di Bon Jovi, a mira e invitacion y a haya informacion di contacto online pa un miembro di personal di Bon Jovi. El a manda e escritonan di su studiantenan tocante keda na cas durante cuarentena.
Un miembro di personal a contesta cu Bon Jovi tabata kier a conoce e muchanan, y el a aparece riba pantaya di nan laptop pa 10am dialuna.
“Meneer B. a pone boso skirbi y mi tabata hopi emociona di tende esaki”, e ex- cantante di Bon Jovi a bisa e studiantenan, “pasobra si bo pone bo sentimentonan riba papel tin biaha nan ta bira un cantica, tin biaha nan ta bira un storia y bo nunca sa unda esaki por hiba bo.”
Te awo, e cantante a ricibi miles di propuesta online, algun di nan e ta agrega den presentacion di e cantica cu e ta transmiti online for di su cas na New Jersey.
Mientras e 20 mucha di kleuter – y nan mayornan – tabata mira, Bon Jovi a toca un guitara acustico y a canta tres escrito di e muchanan tocante bida den cuarentena, tur tocando riba temanan di isolacion y haci nada.
Despues di canta ocho linea terminando cu ‘mi mayornan ta haci nan best/ pero mi sa cu nan tin stress’, el a felicita e autor, un mucha homber yama AJ. “Bo ta un strea di rock and roll, nos a skirbi esaki hunto, ami y abo.”
Bonick siman pasa a duna huiswerk y curasha e muchanan chikito pa skirbi tocante unda nan ta y cu ken nan ta. El a bisa cu e tema recurente tabata ta sera na cas, cu ta ok pasobra e kier pa e muchanan documenta nan bida den un tempo asina extraordinario.
“Unabes nos sali di esaki – pasobra nos lo sali di esaki – ta historia”, el a bisa.
