Ley di Reino o ley di Mike… Mihor esun di…

Dos siman pasa, dia 29 di juni, nos a dedica un Editorial na e tema si nos ta bay haya un ley di Reino, o continuacion di e ley local di supervision financiero. Dos siman despues, aparentemente esaki ta un di temanan riba mesa ainda pa negocia cu Hulanda, y cu mester keda cla den algun dia.

Pa nos sorpresa e biaha aki nos Promer Ministro ta esun cu ta bin na defensa di e ley naci durante gobierno anterior, den ultimo dianan di april 2015, tempo cu e secretario di estado Plasterk a bin acompaña pa algun funcionario halto di su ministerio, pa bin regla e supervision financiero ‘de una vez por todas’. Gobierno di Aruba a realisa cu no tabatin sentido mas pa keda protesta contra supervision financiero di Reino, y na ultimo momento a bin cu e ‘fabuloso’ idea di un ley di Aruba mes, pero cu e supervision di Reino hinca aden. E Hulandesnan a bay di acuerdo, y bao di protesta e fraccion cu tabata apoya gobierno a aproba e ley aki. Oposicion a vota contra, naturalmente. Nos no ta bay ripiti tur loke a bisa den e dianan ey, pero en todo caso e sentimentonan contra e ley tabata masha fuerte mes. Tanto asina cu despues di cambio di gobierno e atakenan riba e ley cu e partido grandi den gobernacion tabata lansa contra e ley, cu nan tabata mira como surgi di e repertorio di triki di e anterior ministro presidente, no a bira menos.

Na fin di 2018 gobierno di coalicion a firma un protocol cu Hulanda, pa adapta e ley local y hinca e acuerdonan nobo den esaki. Na lugar di solamente pone e cambionan palabra, a bin e accion tan comenta di ‘eclipse’ Reino for di e ley, reduciendo esaki riba papel na un supervision unda e organismo di control lo mester a duna cuenta solamente na parlamento di Aruba. Nos ta corda bon cla cu di banda di gobierno no tabatin nada di sano huicio di desconseha nan coleganan di partido pa no haci esaki, pasobra aparte di ridiculo esaki no lo a keda asina di parti di gobierno Hulandes. Tabatin un celebracion no asina chikito ey den sala di parlamento, y conocedornan di e materia tabata contempla cu horor e manera di actua aki, bao di e consigna “Ta nos ta e organo mas halto di Aruba; ta nos ta manda”. Aparentemente e damas y caballeronan a lubida cu nan ta parti di algo mas grandi cu Aruba, y cu e entidad ey a dicidi di impone supervision, cu nos gusta o laga. Seguidamente a surgi e realismo, cu e ley aproba ey tabata ‘going nowhere’. Pareu e lo mester a bay pa Gobernador firma, su destino lo tabata seya. Asina e ley a yega na su morto promer cu el a nace oficialmente. Seguidamente, te awe, gobierno di Aruba y esun di Hulanda a coopera cu otro, mester bisa varios biaha di bon manera tambe, cu e ley bieu cu supuestamente no tin validez segun cierto hende, combina cu e acuerdonan di e protocol.

Lo tin lector cu lo puntra ta pakico nos ta dedica tanto atencion na e sucesonan aki. E motibo ta cu awor Hulanda a mira un oportunidad di deshaci completamente di e ley local di supervision, y bolbe na un ley di Reino, cu pa su contenido pa mayor parti ta identico na e ley di Aruba, pa e simple motibo cu e ley di Aruba a ser deriva di e ley di Reino di 2010 cu ta vigente pa e dos otro islanan. Anto kico ta e contesta di e gobierno cu nunca a gusta e ley inventa pa e partido rival? Aparentemente nan ta prefera di keda cu e patrimonio intelectual di e partido rival, y no bisa Hulanda cu ta OK pa crea un ley di Reino di supervision. For di un punto di vista oportunista nos por comprende e hugada aki: e ley local, sigur pa hende no asina bon informa, ta mas facil pa defende cu un ley di Reino cu ta duna e apariencia cu ‘nos a entrega’.

E pregunta grandi cu ta keda ta si Hulanda ta bay guli e propuesta aki. Nan a pasa den un mal experiencia cu e ministro presidente aki, den e sentido cu den practica a keda comproba cu e no tin suficiente poder di conviccion pa taha cierto parlamentarionan bin cu idea cu for di punto di vista huridico merece e label ‘disparate’ y cu, pasobra e no tabata por o no a desea di para nan, e colaboracion cu Hulanda a bay malo. Pregunta: con na e momento aki ta pensa cu Hulanda ta bay expone su mes na un repiticion di loke a pasa aña pasa den nos parlamento? E Hulandesnan tambe conoce e famoso dicho di e burico cu no ta golpea su pia dos biaha na mesun piedra…

Ta hopi dificil pa imagina pues cu e asunto ta termina den un ‘victoria’ pa e actual ministro presidente y de paso tambe pa esun anterior, cu lo a logra gana punto cu e suceso historico, cu hasta su rival di semper ta defende ‘su ley’ dilanti Hulanda. “Het kan verkeren,” e Hulandesnan ta bisa.