29SemanaSanta.jpg

Vocero di Cuerpo Policial Liliana Rasmijn ta conta Bon Dia Aruba cu e fin di siman cu a pasa tabata relativamente keto den e areanan di campamento, sinembargo, riba caya tabata tin varios caso di accidente y atraco cu a tuma luga casi tras di otro.

Atraco 
Diadomingo anochi alrededor di 8:30pm, a drenta informacion na Polis cu 2 hende homber a atraca na Ying Ping Mini Market unda antes tabata 7/11 na San Barbola. Nan tabata bisti na preto,nan tabata papia spaño, nan tabata bon arma anto ningun di dos tabata tin nan cara tapa. 
Nan a bay cu casi 1200 Florin y tambe carchinan di telefon. Net un rato despues alrededor di 8:45,un otro yamada a drenta cerca Polis cu tabata tin un otro atraco tumando luga na Cacique Store na Macuarima. Akinan 2 hende homber a baha bisti na blauw, tambe arma y nan a bay cu mas o menos 400 Florin y un caha di chuculati. Nan a subi den un auto blanco y bay den direccion di Urataca.

Segun declaracion di Sra.Rasmijn, no tin ningun indicacion ainda cu e 2 casonan aki ta conecta cu otro pa motibo cu esunnan cu a atraca na Ying Ping Mini Market a scapa na pia y e otro 2 persona cu a atraca Cacique tabata tin un auto. E 2 casonan aki a casi pasa simultaneamente y na Cacique Store no tin camara. Sra. Rasmijn kier recorda comunidad atrobe cu si a mira algo of kier duna polis algun tip pa por fabor yama e number 11141 pa laga informacion atras den forma anonimo.

Futuro maestra di scol ta fayece na Noord
Un otro caso hopi lamentabel a tuma luga diadomingo mainta, a drenta informacion via 911 alrededor di 6or un homber ta spierta na su cas y a mira cu su pareha no tabata mustra bon.  Ambulance a yega e sitio y a yama polis despues pa bin asisti pa motibo cu tabata tin dificultad pa traha cu e persona. Nan tabata purba reanima e persona pero e no tabata reacciona. No por a haci nada mas pa e mucha muhe di 22 aña y Dr. Mungra a constata morto 6.34 di mainta. Segun Sra. Rasmijn e curpa a wordo laga liber pasobra no tin ningun indicacion cu un crimen a tuma luga. Tin indicacion cu su curason a para pero nunca e mucha a keha di a sinti algo  malo di salud ni tampoco e tabata tin problema serio di salud. E tabata un studiante y tabata casi cla pa cuminsa un carera manera maestra di scol. Tin hopi storia circulando segun Sra. Rasmijn cu ta totalmente falso pa motibo cu no a haya nada cu por indica cu e mucha tabata bao di influencia di un of otro substancia. E famia tin e opcion pa haci un autopsia pa saca afo ta kico exactamente a pasa cu ne.

Prome morto den trafico pa aña 2016
Pa locual ta accidente, e fin di siman aki tabata tin varios accidente rond di e isla te cu Aruba a conoce su prome morto den trafico. Aldrich Geomar Trimon, 33, tabata envolvi den un accidente di trafico un siman anterior, cual tabata riba 19 di Maart, cu su motorcycle cu a pega den un auto pariba di e rotonde di Paradera. E tabata den hospital pa algun dia pero su situacion a sigui grave pa motibo cu e tabata tin trauma paden di su curpa anto e la bay den un coma, a purba di haci operacion riba dje pero no por a haci nada. Diasabra ultimo, alrededor di 10:10 di mainta Dr.Ramos a constata morto.

Un otro accidente cu a pasa di un auto cu a bolter riba e caminda di Sasaki dilanti House Of Cheng a laga un persona basta herida cu hopi sla na su pecho pero e no a keda den hospital. Su declaracion ta cu un auto a cer’e riba caminda di Sasaki anto esaki a pone cu e la perde control. Hopi accidente a tuma luga caminda varios tabata pa motibo di velocidad halto, coriendo auto bao influencia y papiamento riba telefon. Tabata un fin di siman basta druk pero segun Sra. Rasmijn, Polis tabata bon prepara no solamente pa temporada di Semana Santa y campamento, pero pa  locual ta pafo di campamento tambe manera control riba lama y mas.

LEAVE A REPLY

Please enter your comment!
Please enter your name here