Anochinan poetico a bira algo grandi na Aruba. Esun mas reciente a tuma luga na Rancho. Den pasado Bon Dia Aruba a skirbi hopi tocante esaki, pero recientemente tin hopi cambio positivo a pasa. Den un entrevista cu un di e prome organisadonan di anochinan aki esta Maria Silva e ta conta kico precisamente a tuma luga.
Manera ya ta conoci, anochinan poetico cu a cuminsa na Cuba’s Cooking y tiki tiki a cuminsa crece. Awendia, segun Silva, anochinan poetico ta wordo hiba diferente caminda riba e isla den un forma di colaboracion cu luganan y negoshinan chikito cu ta poco conoci pa comunidad. Manera entre otro Macamba’s tuintje, Beam y e Incubator Garden na Cas di Cultura. Ya caba tin plannan pa cuminsa busca luganan mas pariba di e isla, Pues Santa Cruz, Savaneta, Pos Chikito y San Nicolas.
“Tin e anochi di poesia na Rancho tabata algo magico. Mi tin cu gradici Beach Lama pa sugeri esey. Pasobra anochinan poetico a cuminsa mas cu 15 aña pasa y tabata tin anochinan dos hende so tabata bin, semper mi tabata wak e organisadonan perde motivacion. Pues mescos cu Rancho, nos sa precisamente con e ta sinti pa wordo lubida y laga atras”, Silva ta bisa. Anochinan poetico cu a cuminsa manera algo intimo, awo ta conta cu audiencianan di 100 of mas hende y un sin fin di hoben y hende grandi cu ta warda un luna completa esey pa yega riba stage y comparti nan talentonan.
Creando espacio
Den e ultimo dos añanan, Art Rules Aruba tambe a uni cu anochinan poetico.
Y awo tambe nan ta conta cu sosten di Unoca y Purple Entertainment cu ta colabora unda por cu ekiponan.
“Como cu Art Rules ta duna un les di skirbimento, el a bira custumber cu e klas lo bin un anochi di poesia y presenta kico nan a traha riba dje. Y asina mas hoben a cuminsa bin.
Pero locual mi ta haya mas impactante na esaki ta cu poco, poco mi a ripara con hopi hoben tin eyfo cu no ta concerni cu impresiona niun hende, si no mas bien kier impresiona nan mes.
Bosa, e mucha muhenan ey cu no necesariamente ta fit un cierto stereotipo pero cu ta asina confortabel cu ken nan ta. Nos tin amanan di cas cu ta bin, tatanan, hobennan cu ta lesa pagina di nan diary’s. El a bira un ambiente unda tur cos ta sigur. Y ta asina importante pa crea espacio pa hende por expresa nan mes. E no ta bay solamente pa e sosten cu nos ta ricibi di Unoca, sino mas bien pa echo cu hende ta cuminsa realisa cu e ta algo importante pa tin den comunidad”, Silva ta subraya.
Orguyo
Silva ta comenta cu e ta hopi orguyoso cu mas y mas hende ta birando familiar cu
anochinan poetico y kier bin demostra nan talento.
“E ta un bunita manera pa comunica cu otro, pa cera conoci cu e comunidad. Y no ta esey so, hopi hende cu tabata bin anochinan poetico awo a bay afo y ta sigui den e mundo ey. Tin ora nos ta skype of pasa videonan di hendenan cu ta afo den un manera di conecta nan bek cu nos.
Mi a wak asina tanto hende cu a cuminsa hopi timido, awo sali completamente di nan timidez
Y duna tur cos riba escenario. E ta algo hopi bunita pa wak, e ta haci mi sumamente orguyoso.”
