Dialuna y diamars deviacion di trafico den Playa

Relaciona cu apertura di aña Parlamentario nobo diamars awor, Polis lo cera e caminda cu ta pasa dilanti e edificio di Parlamento situa riba L.G. Smith Boulevard.

Esey ta sosode dialuna awor for di 8’or di mainta pa 12’or di merdia en conexion cu training y riba diamars for di 7’or di mainta pa 12’or di merdia en conexion cu e ceremonia oficial di apertura di aña Parlamentario nobo 2016-2017.

Ya caba riba dialuna mainta ta cera e mesun caminda ey pa e militarnan por train y prepara pa e reunion cu ta tuma luga tradicionalmente riba e di dos diamars di september. Polisnan riba brommer lo compaña S.E. Gobernador di Aruba pa e reunion aki, mientras cu Alto Comisario di Polis, Dolfi Richardson, tradicionalmente ta compaña nos mandatario durante dicho reunion publico.

Ta corda tur automobilista cu lo cera e caminda pa trafico di ambos direccion, for di e crusada na altura di Cas di Gobernador te cu Renaissance Resort & Casino. Lo desvia trafico cu ta bini di pariba (Talk of the Town) na crusada Adriaan Lacle Boulevard y na crusada Maria Christinastraat, na altura di ex Cas di Gobernador. Lo desvia trafico cu ta bini di pabou na crusada Paardenbaaistraat, ex DOW. Lo cera Oranjestraat tambe for di crusada Zoutmanstraat, Fort Zoutman, te cu L.G. Smith Boulevard.

Pa evita inconveniencia, ta conseha automobilistanan pa tuma rutanan alternativo durante dialuna y diamars mainta y asina evita pa uza e parti ey di L.G. Smith Boulevard. Despues di e evento merdia lo habri e caminda atrobe pa trafico.