(EFE) – Mas di cinco miyon Colombiano ta sufri of a sufri di desnutricion cronico. Y como consecuencia di esey, nan ta menos inteligente y mas pober pa via di hamber, segun cifranan di Asociacion di Alimento di Colombia (Abaco).

10.8% di muchanan menor di 5 aña na Colombia, loke ta nifica mas di 500.000 mucha tin desnutricion cronico, un malesa ireversibel cu ta afecta no solamente nan crecemento sino tambe nan desaroyo fisico, cognitivo y emocional.

Un mucha naci na Colombia cu ta sufri di desnutricion cronico lo alcansa solamente di 50 pa 60% di su potencial di entrada, Abaco a informa.

Durante e tres prome aña di bida ta forma e 80% di celebro di ser humano, pa loke e nutricion optimal ta fundamental pa garantisa cu nan masa celebral lo aumenta y neurona lo conecta.

Desaroyo cognitivo ta determina aprendisahe, capacidad di progresa miho y compronde cu tur loke ta sucede rond ta clave pa logra un miho rendimento escolar y exito mayor ora e lo bira adulto.

Di e forma aki, hamber y desnutricion ta haci cu personanan “ta menos inteligente, menos productivo y cu mas chens di sufri malesanan, pa loke nan no ta capaz di aumenta nan entrada y mehora nan medio di bida”, e asociacion a detaya.

Evidencia cientifico ta demostra cu un adulto cu a sufri di desnutricion cronico den prome dos aña di su bida tin 14.6 punto menos di coheficiente intelectual, cinco aña menos di enseñansa y 54% menos di salario den su bida adulto.

Na Colombia pa personanan alimenta nan mes di un forma sano ta costa 423.000 peso mensual (104 dollar) pero tin 20.2 miyon persona cu ta gana 354.000 peso (87 dollar) of menos, loke ta nifica cu nan no tin pa cumpra un canasta basico, segun e organisacion aki.

Banco di alimento ta denuncia cu e cifranan ta alarmante, 12.2% di e poblacion ta biba den pobresa extremo, La Guajira ta esun di mas pober y 16% ta biba den pobresa multidimensional, mientras cu na e pais “ta wordo tira afo e tercera parti di alimento cu ta wordo produci”.

LEAVE A REPLY

Please enter your comment!
Please enter your name here