“Barco mara no ta paga fleta.” E frase popular aki ta refleha loke nos industria di crucero ta pasando aden. Tambe e efecto di loke esaki ta nifica pa e mercado di nos turismo crucero.

 

E fin di siman aki tabatin mara den nos waf di crucero, tres barco, dos di e compania Norwegian Cruise Line (NCL) y adicional e barco crucero fiel, Freewinds cu a haci di Aruba su home port. Tambe nos ta bin hayando bishita di Carnival. Tres crucero cu capacidad pa alrededor di 2.300 pasahero cada un, cu excepcion Freewinds cu tin capacidad pa 540 pasahero. Pero mirando e restriccion cu tin actualmente debi na e pandemia di Covid-19, niun di nan tabatin pasahero abordo, solamente nan tripulacion limita.

 

A pesar di e situacion aki tin un biento di speransa. Siman pasa e compania Italo-Suizo di crucero MSC Crociere S.A. a dicidi pone nabega nan barco nobo “Grandiosa” cu a cuminsa bishita e costanan di Italia. MSC a bira e prome compania global cu a anuncia e operacion di nan linea di crucero pa e mercado di Mediterraneo.

 

Nan a dicidi di start, despues cu nan a sufri un perdida di un 98% di nan entrada. E panorama financiero aki ta domina e industria di crucero como resultado di e restriccion cu autoridadnan di salubridad publico a impone pa contraresta cu e Coronavirus lo sigui plama y produci mas victima.

 

Pero e medidanan stricto y protocol di higiena cu e pasaheronan mester cumpli cune ta haci di nan biahe di turismo uno no mucho placentero. Sinembargo nan presencia ta trece dilanti di nos wowonan un panorama di positivo. Pero con leu nos ta di e realidad aki? Luna di september tabata uno tentativo pa cuminsa ricibi e prome turistanan crucero, meymey di e pandemia di Covid-19 pero …. ainda e ta vigente pa Aruba cuminsa ricibi turistanan crucero?

 

Turista crucero

Bon Dia Aruba a consulta directora di Aruba Tourism Authority (ATA), Ronella Tjin Asjoe-Croes, kende a bisa cu pa loke ta 2020, ainda tin hopi incertidumbre den e industria di crucero. E ehecutivo di turismo ta haya cu sin duda Covid-19 tabata devastador pa e industria di crucero.

 

Pa loke ta nos situacion local, aña pasa nos turismo crucero tabata uno biento en popa. Segun informacion di ATA, 2019 tabata un aña hopi bon cu 832.001 bishitante di crucero. Sinembargo desde maart 2020, e industria di turismo crucero ta paralisa. Esaki sigur ta afecta tur stakeholder cu ta depende di turismo crucero. Lamentablemente ainda no tin un fecha concreto ni oficial di ki fecha e operacionnan lo inicia.

 

Si por bisa cu Centers for Disease Control & Prevention (CDC) recientemente a extende e ‘no sail order’ te cu fin di September. Pero mayoria di e lineanan di crucero a indica caba cu lo a mantene e suspension di operacion te cu fin di October 2020.

 

E industria ainda ta en espera di e protocolnan y acuerdonan necesario pa re inicia operacion den e industria aki. E ta keda un reto, considerando intentonan recien na Noruega cu mester a interumpi un itinerario door di casonan riba e barco.

 

Informacion cu e matutino aki a yega di compila ta indica cu e compania MSC a adopta un plan anti-Covid cu ta inclui test pa tur nan pasaheronan y nan tripulacion. Esaki ta exigi full un logistica. Nan a condiciona 15 stacion of post pa tuma muestra cu e capacidad di procesa 24 prueba simultaneamente cu e metodo di immunofluorescencia (IF)

 

Esunnan cu ta resulta positivo mester warda den un sala steriel. Eynan mester haci un serie di control di salud mas profundo y mas stricto pa asina bin cu un decision final. Esunnan cu ta resulta negativo, si nan por aborda e barco y nan ta haya un certificado.

 

Scenario

 

Tjin Asjoe-Croes a splica cu pa 2020 ta traha cu dos scenario. E scenario cu actualmente nos ta aden ta e ‘mid case’ scenario. Den e scenario cu Aruba ta actualmente, e industria di turismo crucero lo conoce un bahada di alrededor di 62% compara cu 2019. Si e situacion sigui empeora pa e industria, no lo por descarta cu pa 2020 no lo ricibi ningun barco di crucero mas. Esaki lo ta e ‘worst-case’ scenario pa un bahada di alrededor di 69% compara cu e aña pasa cu a resultado uno fructifero pa Aruba su turismo crucero.

 

Kico nos partnernan ta pensa riba e situacion aki, specificamente pa Aruba? Aunke no tin indicacion concreto ainda -segun directora di ATA- informacionnan cu ta bin di e industria ta duna indicacion cu 2021 ta mustra mas alentador.

 

E industria ta depende hopi riba e sosten di e ‘cruisers’ cu ta wardando ansiosamente pa e industria cuminsa atrobe cu nan itinerarionan. Tjin Asjoe-Croes ta reconoce tambe cu no tin duda si cu e retonan dilanti ta grandi, cual “e lineanan di crucero y e industria en general ta nabegando miho cu ta posibel pa asina sobrevivi e crisis aki.”

 

Aunke aworaki e enfoke ta hopi ariba sobrevivencia y otro retonan manera logra hiba tripulacion bek cas, directora di ATA por bisa cu Aruba Tourism Authority conhuntamente cu Aruba Ports Authority ta mantene contacto cu e lineanan di crucero, y demas instancianan di e industria manera Florida-Caribbean Cruise Association (FCCA) y Cruise Lines International Association (CLIA) pendiente di desaroyonan, di e miho manera cu por.