19mrt, JM, Mediador di Gobierno.JPG

“Para na banda tur hende por score gol” tabata palabranan cla di Sr. Anselmo Pontilius mediador di Gobierno riba insinuacionnan di oposicion cu Gobierno lo no ta haciendo su esfuerso den e asunto di Aura Casino. “E tipo di situacionnan aki ta dificil. Y no ta pasobra bo ta Gobierno of tin cierto autoridad, bo por obliga partidonan pa yega na un acuerdo. Ta un cuestion di convence otro pa logra e miho resultado”, Sr. Pontilius a resumi. Cu e declaracion aki mediador di Gobierno kier a kita tur duda cu ta wordo crea cu Minister di Labor of Gobierno no tin atencion pa e caso aki.

“Minister di Labor y mi persona como mediador ta siguiendo e proceso aki continuamente. Di nos banda ta importante pa cumpli cu nos leynan y mira te na unda nos por interveni. Na e momentonan aki tin 2 proposicion riba mesa y e partidonan, esta e operador nobo y FTA ta na mesa. Minister di Labor a duna instruccion na mi persona pa apoya e proceso aki di cerca. Esey ta exactamente locual nos ta haciendo tambe. Insinuacionnan di oponentenan politico na e momentonan aki no ta yuda na nada den e proceso aki”, Sr. Pontilius a declara.

Sr. Pontilius den su entrevista a enfatisa cu Gobierno ta haciendo su maximo pa asina duna tur apoyo na e proceso pa asina logra na e miho deal pa e trahadonan. Tambe Sr. Pontilius a mustra cu di nan banda a trata na mantene contacto directo cu e hotel tambe pa por influencia nan tambe den henter e asunto aki.

“Si gobierno a trek in e permiso di casino for di prome caba, ningun partido lo por a haya e oportunidad pa bira un operador nobo. Cu otro palabra esey sigur no tabata un opcion na e momento nan ey”, Sr. Pontilius a declara. Ta lamenta cu partidonan opositor of nan coordinadornan, ta haci uzo di algo asina delicado pa politikeria.  Esaki no ta yuda na e proceso pa yega na un solucion.