Ayera, dia 14 di juli nos ta recorda 20 aña di fayecimento di un di e politiconan femenino cu mas a destaca durante e añanan 70 y 80 di siglo pasa, esta sra. Grace Heronimo-Bareño (dfm).

Grace a nace na Aruba dia 22 di maart 1945. Na un edad hoben Grace a tuma e decision pa drenta arena politico y a aparece pa prome biaha riba lista di MEP na 1975 y tabata e prome dama cu a yega di aparece riba nos lista, obteniendo 455 voto, cual ta un cantidad considerabel e tempo ey. Te cu e eleccion di 1989, Grace fielmente a aparece riba lista di nos partido.

Grace tabata tambe e prome dama na Aruba cu a asumi e encargo di diputado. Durante su trayectorio como gobernante, Grace a dedica gran parti di su trabao den e area social y specialmente pa esnan cu limitacion. El a percura pa crea facilidadnan adapta pa e grupo special aki, e.o. pasadia pa mucha cu limitacion, scol pa personanan cu limitacion, pasadia pa adulto cu limitacion y centro di entrenamento. Tambe tabata bao di su maneho cu onderstand a bira un derecho pa tur esnan den necesidad.

Grace tabata tambe miembro di Eilandsraad. Como politico activo, Grace a lucha schouder cu schouder cu nos libertador Betico Croes y tabata danki tambe na su perserverancia, curashi y determinacion cu awe nos tur riba Aruba ta gosa di nos Status Aparte.

Como muestra di aprecio y reconocimento, MEP a duna e hala femenino di partido e nomber di Forza Femenino Grace. Su lealtad incondicional na su partido MEP y su stimacion pa Aruba lo keda semper graba den nos memoria. Cu Grace sigui sosega den brasa di nos Señor.

 

LEAVE A REPLY

Please enter your comment!
Please enter your name here