Merca a alcansa un ‘momento Sputnik’ nobo , den cual ehercito mester actua pa mantene e bentaha competitivo den espacio contra adversarionan manera Rusia, China, y na un menor grado, Iran y Nort Korea, segun presidente di Joint Chiefs of Staff a bisa ayera.
General Joseph Dunford a haci su comentario durante un ceremonia na Peterson Air Force Base reconociendo e re- lansamento di e Comando Espacial Mericano.
El a compara e re- lansamaneto di e Compando Espacial di Donald Trump na e yamado pa accion di presidente John Kennedy despues cu Union Sovietico a cuminsa e carera espacial cu Sputnik, e prome satelite lansa na 1957, cu e prome biahe espacial cu tripulacion na 1961.
“Den mi opinion, no ta un exageracion pa bisa cu nos ta den otro momento Sputnik”, Dunford a bisa. “Y bo por argumenta cu locual ta den wega ta hopi mas cu locual tabata na fin di decada 1950 y cuminsamento di 1960.”
Pentagono tabatin un Comando Espacial Mericano for di 1985 te cu 2002, pero esaki a desmantela despues di e atakenan terorista di 11 di september pa enfoca riba defensa di patria. Trump a bisa na december cu e lo reestablece e Comando Espacial cu meta di mehora e operacionnan espacial di e organisacion a traves di militar Mericano, y pa agilisa desaroyonan tecnico.
Comando Espacial no ta Forsa Espacial, un servicio militar separa cu Trump kier, pero cual congreso mester aproba. Den un ceremonia na Cas Blanco siman pasa, e presidente a bisa cu Comando Espacial ta representa un reconocemento di e rol central di espacio den siguridad y defensa.
Rusia y China ta poniendo enfasis mas grandi riba nan capacidad espacial, y a desaroya tecnologia y armanan cu lo por interumpi of destrui satelite, Dunford a bisa. Iran y Nort Korea tin capacidadnan menos desaroya, pero toch ta un menasa, el a agrega. Comando Espacial a bira necesario no solamente pa competi, sino tambe lo ta esencial pa e habilidad di e pais pa bringa guera, el a bisa.
Comandante nobo di Comando Espacial, general John ‘Jay’ Raymond, a bisa cu e kier evita guera den espacio door di enfoca riba construi forsanan cu lo gana un bataya cosmico y mantene ‘superioridad espacial’ di Merca.
E sede inicial di Comando Espacial ta Peterson Air Force Base na Colorado Springs, cual tambe ta sede di otro unidadnan cu operacion espacial, incluyendo sistema di defensa di advertencia di misil.
