HILVERSUM – Parlamentario di D66 Maarten Groothuizen ta bay haci preguntanan atrobe riba e tratamento y recepcion di refugiadonan Venezolano na Corsou. Desde e ultimo preguntanan haci na 2018 no a cambia suficiente e ta haya. “Hulanda mester yuda mas intensivo y supervisa miho’.

Groothuizen a bishita Corsou pa prome biaha siman pasa y el a spanta di e situacion den e baraknan caminda ta detene e refugiadonan Venezolano. E Parlamentario tampoco ta mucho contento cu e ehecucion di e proceduranan y progreso di e ricibimento di e refugiadonan. Esaki ta segun e fuente di Retkaribense.

“Ma mira con nan ta detene 11 hende den un solo espacio 23 ora largo unda nan mag di sali pafo solamente un ora. Esaki tin biaha pa cuater luna largo. Esaki ta pa Reino Hulandes un situacion excesivo y bou nivel. Nos tin hasta pa hende cu a ricibi un castigo di prizon un standard minimo.”

Groothuizen tambe a ripara durante su bishita cu nan a traha celnan nobo pero ainda nan no ta uza nan pasobra nan no tin lock. “Nan ta keda warda riba nan. Esaki mi ta haya hopi remarcabel dor cu e proyecto aki ta uno chikito y ya andando for di maart.”

E mesun tardansa tin den e implementacion di e proceduranan pa asilo y expulsion, segun Groothuizen: “Hende di IND (instancia di imigracion y naturalisacion Hulandes) a duna training na Corsou. Pero di e refugiadonan mi ta tende cu nan ta detene nan mas largo como cu nan no por paga pa nan ticket. Esaki no por.” ‘No ta Hulanda, sino e islanan mes cu ta responsabel pa ricibi e refugiadonan Venezolano’ – Secretario Knops

Hulanda tin como partner den Reino y como pais Europeo un responsabilidad y p’esey mester eleva nan esfuerso pa mehora y monitoria e situacion di e refugiadonan Venezolano na Corsou, asina e Parlamentario di D66 ta haya.

Pero si e preguntanan nobo aki lo mehora e situacion di berdad, esey mes ta e pregunta. Secretario di Estado Raymond Knops ya a expresa na e portal di Ret Karibense cu e ricibimento di refugiadonan Venezolano ta un asunto di pais mes, pues bou responsabilidad di e islanan mes y no di Hulanda.

“Esaki mi ta haya un contesta mucho superficial di parti di Knops’, Groothuizen ta reacciona. “Nos a palabra den Reino cu pa derechonan humano tin un garantia y esaki no ta un asunto di pais, sino un asunto di Reino. Esaki ta nifica cu Hulanda, e pais mas grandi den Reino, no por wak otro banda.”

E crisis di refugiado Venezolano na Corsou ya ta core for di 204 y desde 2018 organisacionnan cu ta defende derechonan humano a critica Corsou y Hulanda diferente biaha.

Ombudsman di Corsou Keursly Concincion tambe a conclui na 2018 cu Corsou su maneho di expulsion ta violando e tratado Europeo di derechonan humano. Desde 2017 gobierno a tuma over e procedura pa stranhero for di e organisacion di refugiado UNHCR di Nacionnan Uni. Den un rapport hopi critico na 2018 e ombudsman a mustra bon cla cu ainda gobierno no ta ehecutando e procedura ki.

‘Riba nivel di ehecucion mester traha hunto concreto. Den esaki tambe tin un rol pa gobierno di Corsou’ -ombudsman Concincion

“E echo cu Groothuizen ta pone luz riba e situacion di e migrantenan Venezolano den parlamento Hulandes, esey ta un desaroyo positivo”, Concincion ta comenta. “Ta parce mi cu awor mester traha hunto riba nivel di ehecucion pa asina por yega na e mehoracionnan. Den esaki tambe tin un rol pa gobierno di Corsou.”

Parlamentarionan Hulandes ya a haci hopi preguntanan. Pero ainda poco a cambia, pues con mester mira e preguntanan di Groothuizen, nan tin balor? ‘Mi no ta kere cu mi preguntanan lo cambia e situacion di biaha’ – Parlamentario Groothuizen. “Esey bo sa nunca”, segun Groothuizen. “Pero mi ta kere cu politica tambe ta un cuestion di keda ripiti y pone riba agenda. Mi no ta kere cu mi preguntanan lo bay cambia e situacion di biaha.”

Secretario di Estado Knops a indica cu despues di e reces (2 september) ‘lo informa Tweede Kamer kico exacto lo haci cu e suma reserva di 23,8 miyon euro y e palabracionnan cu e islanan riba esaki’.

 

LEAVE A REPLY

Please enter your comment!
Please enter your name here