(AFP) – Meta lo termina un contract grandi cu Sama, e compania a confirma diahuebs, den un decision cu ta sigui aña di critica y proceso legal riba trato di moderadornan di contenido.
Sama tabata contrata pa Meta entre 2019-2023 pa elimina contenido dañino, violento of di odio for di Facebook na Africa Sub-Sahara, pero e compania a bisa cu su trabao awo tabata enfoca riba modelo di inteligencia artificial y ‘machine learning’.
Empresa di ‘outsourcing’ y Meta a haya critica pa condicionnan di trabao malo y despido di empleadonan.
Un corte na Kenya a dicidi na 2024 cu e gigante Mericano por ser demanda pa e acusacionnan.
Den un declaracion, Sama a bisa cu el a “ricibi un aviso formal di Meta, un cliente clave, pa termina un colaboracion importante na nos oficina na Nairobi”.
“E proceso lo afecta 1.08 empleado actual, un cantidad significativo di cual ta traha den e area specifico cu a ser termina,” compania a bisa.
Representante di Sama na Kenya, Annepeace Alwala, a bisa cu nan ta “trahando activamente” pa sostene empleadonan despues di e noticia.
“Nos teamnan ta ricibi salario digno y tur beneficio, y apoyo di conseho na sitio di trabao pa profesional certifica,” Alwala a bisa.
E decision ta sigui despues di varios accion legal.
Na 2023, casi 200 moderador cu a ser despedi pa Sama a presenta un demanda, alegando despido inhusto y acusando cu trahadornan na Kenya a ser someti na condicionnan inhumano, incluyendo trabao forsa y pago iregular.
Intentonan di mediacion despues a faya.
Un otro keho a ser presenta na 2022 pa un ex-empleado Sur Africano di Sama, Daniel Motaung, na Nairobi.
Meta a confirma den un declaracion na AFP cu el a “dicidi pa termina nos trabao cu Sama paso nan no ta cumpli cu nos standardnan”.
