The Mill Resort a yega di pasa casi den e mesun situacion di Alhambra Casino, caminda gerencia di e hotel a pidi un referendum. Mediador di Gobierno, Sr. Anselmo Pontilius a yega di bisa cu den caso cu niun sindicato no ta inscribi pa tin referendum, e ora ey no lo tin referendum mes.
Pontilius a declara na Bon Dia Aruba cu The Mill Resort ta pasando den un proceso aworaki ya cu e hotel aki a wordo bendi y “eventualmente e lo cera si of no”. Pero logicamente esaki no tin di haber cu e peticion di referendum cu e gerencia di e hotel a haci. E sindicato FTA a yega di gana e referendum un aña y mey pasa. Di un grupo di 52 trahado nan a haya e voto mayoritario di 37 trahado. Sinembargo nan a confronta problema cu gerencia di e hotel pa yega na un contracto colectivo.
Mediador di Gobierno a bisa na e matutino aki cu aparentemente e gerencia di The Mill Resort a haci un sondeo cerca nan trahadonan, y nan ta haya cu no necesariamente e sindicato tin mayoria aworaki. Aunke den e mesa di negociacion sindicato FTA a laga sa cu nan por mustra cu nan tin mayoria keto bay. E funcionario ta haya cu ta un tendencia, caminda oficina di Mediador di Gobierno a adverti tanto e dunado di trabou como e sindicato pa no crea problema caminda no ta necesario.
Di acuerdo cu Ley di Referendum e dunado di trabou mescos cu sindicato tin derecho pa pidi un referendum. Unabes cu e publicacion di e convocatorio pa e referendum sali oficialmente, Oficina di Mediador di Gobierno tin pensa di invita e partidonan na mesa, ya cu esaki ta un obligacion cu nan tin cu haci denter di e 14 prome dianan.
