Minister di Husticia, Andin Bikker tabata masha cauteloso pa duna informacion riba e preso cu a huy for di Warda di Polis na Sta. Cruz.

E mandatario a laga sa cu e ta un proceso cu ta andando y cu cuerpo policial y Ministerio Publico (OM) tin atencion riba dje. Tambe el a bay na warda di polis na Macuarima, pa haya un panorama di e situacion. Pero e ta prefera di duna espacio na e dos instancia hudicial aki pa haci nan investigacion.

Ta trata di e fugitivo di husticia, Erick Miguel Schneiders di 25 aña di edad, kende tabata cera pa un caso di asesinato y pendiente di otro caso di intento di asesinato tambe. Bikker kier a trece trankilidad den comunidad relaciona cu e fugitivo aki, considerando cu e ta un persona peligroso.

E mandatario a declara cu pronto nan ta spera di resolve e caso aki. E ta sigura un bes mas pa e ‘pueblo por ta trankil’. Considerando cu e caso aki tin su debido atencion, e ta afirma cu pronto nan ta spera cu e fugitivo di husticia lo wordo deteni atrobe.

Un inkietud cu ta bin dilanti den pueblo ta, con un persona cu su man y pia tabata geboei por a huy? Bikker ta considera cu e tipo di pregunta aki mester wordo dirigi directamente na OM, ya cu e caso aki ta den ‘un proceso den desaroyo’. Igualmente e ta haya cu debi na e separacion di podernan cu ta para den Constitucion, un aclaracion asina ta competencia di OM.

 

 

 

LEAVE A REPLY

Please enter your comment!
Please enter your name here