Durante un conferencia cu partido Raiz a ofrece ayera atardi na Cas di Cultura, nan a expresa nan preocupacion tocante e menasa di Rioolwaterzuiverings installatie (RWZI) na Bubali y loke esaki ta representa pa e naturalesa y economia na e momentonan aki.

Di e palabranan di Ursell Arends, representante di e partido politico RAIZ, hunto cu Raymond Kamperveen, kende tambe ta miembro di e partido, el a splica cu aña pasa nan a haya e reporte for di TNO Caribbean realisa pa Curtney Barrera, den cual ta señala e menasa y desaster cu por causa si den un futuro cercano gobierno no atende cu e proyecto aki.

Arends a informa cu e reporte a expresa cu e situacion aki ta un menasa pa naturalesa y tambe pa turismo, pa motibo cu e manera con a atende e proyecto no ta esun miho. A construi esaki a na aña 1972 y ta representa un ‘Time Bomb’.

Arends a bisa cu nan, como parti di comunidad y comerciantenan, mester ta na haltura di kico por pasa pa perhudica turismo, ya cu e 90% di economia na Aruba ta basa riba turismo.

Asina mes, el a duna di conoce cu tin 53km di tuberia di awa di pos cu ta conecta desde Cas di Paloma te cu Palm Beach Malmok area y tur ta bay te Bubali plas; y segun e reporte di TNO Caribbean si no atende esaki, mirando cu ta den un estado deplorabel y tur e tankinan di cement –cu manera Arends a sigura– a cuminsa cay den otro, prome cu aña 2020 gobierno mester atende esaki.

Di mesun manera, el a bisa cu no a mira ni papia tocante e situacion aki, pero si di e cantidad di camber extra di hotel cu lo construi. Arends a comenta cu e facilidad ta ricibi dos biaha e cantidad di awa cu e por maneha, y e awa cu no ta procesa door di e facilidad aki ta bayendo den lama. Esaki pa motibo cu Bubali plas no por carga e cantidad grandi di awa. Na fin di augustus proximo lo tin un instituto cu lo pidi a traves di Directie Natuur en Milieu (DNM) pa haci un studio.

E Instituto Caribbean Research & Management of Biodiversity Institute (CARMABI) lo bay produci un reporte y mester ta consciente cu den e area di lama dilanti di Bubali plas full e bida marino ya ta morto, y tin algun especie di alganan cu ta creciendo cu ta peligroso pa e ser humano.

E problema aki, segun Arends, mester ta conoci pa comunidad pa motibo cu nan tin cu sa con lo bay atende e problema, pa motibo cu esey por causa un desaster, manera TNO a reporta: “Full e area di hotel y Oranjestad lo bay ta bou di awa” pasobra e awa aki lo inunda e hotelnan y lo afecta turismo y economia.

Tocante e riesgo y peliger di calamidad cu e problema ey ta trece cune na Bubali plas, e facilidad por atende un total di 10.000 meter cubico di awa pa dia y e cantidad cu e ta procesando awor ta surpasa pa dos biaha e cantidad cu e por ricibi.

Di otro parti, e sistema cu ta manda oxigeno den awa pa oxigena e contaminantenan no por atende e cantidad di awa cu ta ricibi, ademas cu e ta mucho bieu caba, pues e kimiconan cu ta malo tanto pa naturalesa y pa ser humano no ta procesa adecuadamente, causando enorme daño na bida marino.

Ademas, Arends a comenta cu TNO a bin cu solucion cu mester ta atendi urgentemente, pero tempo ta pasa y nada a wordo haci. P’esey nan como Raiz a dicidi cu nan mester trece dilanti e problema aki, pa duna di conoce e pasonan cu mester tuma pa coregi e problema.

“Tur e awa cu ta bin for di Cas di Paloma, Malmok y full area di hotelnan ta wordo manda pa Bubali plas y e awa di e tankinan mester ta procesa, mirando cu e mashinnan ta trahando na 40% di nan capacidad”, Arends a sigura.

Raiz tambe ta trahando riba nan mesun proposicion, manera Arends a comenta, cu TNO a señala claramente cu pa renoba e facilidad e lo rekeri di un inversion di 12.000.000 florin. Desde 2014 a haci estudionan pa conseha gobierno pa hinca e facilidad aki bou maneho di WEB en bes di DOW manera ta awor, pa asina e proceso por bira den un sistema di ‘revenue generation’ pa WEB.

Pa finalisa, Arends a informa cu partido Raiz tambe kier bin cu un colaboracion di industria den cual fundacionnan, parke nacional y NGO por atende e problema aki prome cu e bira un desaster. Di mesun manera, el a bisa cu nan kier participacion di DNM pa haci un esfuerso pa sanea e problema hunto cu WEB y DOW, como tambe sosten di sector turistico pa drecha e situacion.

 

LEAVE A REPLY

Please enter your comment!
Please enter your name here