(EFE) – Minister Colombiano di Tecnologia di Informacion y Comunicacion (TIC), Karen Abudinen, diahuebs ultimo a renuncia di su funcion despues di un scandal di corupcion pa presunto iregularidad di un contract miyonario pa e conexion na internet di mas di 7.000 scol rural.

“Cu respet Sr. Presidente: mi ta presenta mi renuncia irevocabel di e funcion di minister di Tecnologia di Informacion y Comunicacion”, e minister a expresa ayera den un carta dirigi pa e presidente di Colombia Ivan Duque.

Dialuna ultimo, Procuraduria General a anuncia un investigacion disciplinario contra Abudinen pa determina su responsabilidad pa iregularidad denuncia den e etapa di destaho publico pa “Centronan Digital”, asina como den e firma y ehecucion di e contract suscrito na Union Temporal di Centronan Poblado di Colombia.

Abudinen a sigura cu el a procede cu “honra y transparencia” y a insisti cu e tabata esun cu a denuncia e corupcion di esunnan “cu a defrauda e sociedad”.

Pa cuminsa ehecuta e contract, cu su balor tabata supera un biyon di peso (casi 263 miyon dollar), e Gobierno a duna pa Centronan Poblado, un di e dos contratista, un anticipacion di 1.000 miyon peso (18 miyon dollar).

Sinembargo, medionan local a revela cu e contratista, cu no tabatin experiencia ni capacidad pa cumpli cu loke a wordo acorda, a presenta tres documento di seguro di garantia bancario falso pa e destaho y despues di ricibi e anticipacion no ta mucho loke e ehecucion di e contract a avansa.

Pa e caso aki, diabierna di siman pasa e minister a enfrenta un debate di mocion di censura na Camara di Representantenan, cita pa congresistanan di oposicion cu ta pidi su renuncia.

E presidente Duque a defende e minister, aunke e scandal di corupcion a debilita su Gobierno y su partido, e derechista Centro Democratico, ora ta falta menos di nuebe luna pa eleccionnan presidencial di aña 2022.

LEAVE A REPLY

Please enter your comment!
Please enter your name here