Mirando cu Hulanda desde un principio a duna su apoyo tecnico y financiero na e Plan Crisis Social di Aruba, Minister Glenbert Croes ta consider’e su responsabilidad pa por presenta un reportahe financiero y social na instancianan importante di Hulanda, di e avancenan logra te cu awo.
Segun un comunicado di gobierno, Crisis Plan Social (SCP) cu ta den pleno implementacion, tin 31 proyecto den ehecucion y ta carga e sosten di henter e sector social di Aruba. Tur instancia a cera cabes hunto pa por purba trece e alivio den e problemanan social cu ta grave na Aruba. Mientras tanto, tin avancenan logra danki na e compromiso y dedicacion di tur envolvi.
E prome reunion oficial di Croes na Hulanda tabata cu Secretario di Estado, Paul Blokhuis, kende a haya un presentacion amplio di e SCP. Un plan cu ta wordo ehecuta simultaneamente na nivel di 4 ministerio, demostrando e compromiso di Gabinete Wever-Croes na e SCP.
Durante otro reunion, Croes a gradici e Defensor di Pueblo, esta e Nationale Ombudsman di Hulanda, pa a ricibi e delegacion di Aruba y tambe pa e oportunidad di por a presenta e desaroyo di e SCP.
Finalmente, Croes a presenta e reportahe di SCP na Minister di Asuntonan Social y Labor di Hulanda, Wouter Koolmees. Compaña pa su Director di Asuntonan Internacional, Roel Gans, Koolmees a ricibi e delegacion di Aruba, consistiendo di Glenda Hernandez; Director di Departamento di Asunto Social, Omaira Lares; Director di Departamento di Recurso Humano, Viviana McDonald; e HR di SCP y Nuris Dabian di Arubahuis, encabesa pa Minister Glenbert Croes. E delegacion a presenta un relato extenso y detaya di e Crisis Plan Social na e mandatario Hulandes.
