Rond di 10.000 Venezolano a purba di crusa, den fin di siman pasa, e frontera di Colombia cu Ecuador, ya cu awe dialuna lo drenta na vigor e rekisito di un visa humanitario pa e migrantenan di e pais ey cu ta busca drenta teritorio Ecuatoriano.
E paso fronteriso principal, na e brug internacional di Rumichaca, diasabra pasa tabata punto di un volumen halto di Venezolano, compara cu e ultimo lunanan den cual e fluho a baha pa motibo di e solicitud di un visa humanitario similar di parti di Peru; un di e destinonan principal di e migracion aki.
E cancilleria Ecuatoriano a recorda diasabra pasa cu e exigencia di visa pa ingreso nobo di Venezolano ‘lo bay ta obligatorio desde dialuna 26 di augustus’.
Y a precisa cu e ciudadanonan Venezolano cu a drenta entre 26 di juli y 25 di augustus no lo beneficia di un proceso di amnistia cu a ser anuncia pa e Gobierno, tampoco lo por acoge pa e visa sin excepcion di rason humanitario.
Sinembargo, a aclara cu e Venezolanonan cu yega na e pais lo por aplica pa e otro visanan regarda den e ley, semper cu nan cumpli cu e rekisitonan.
Tanto Ecuador como Colombia a implementa e prevision di plannan di contingencia na ambos banda di e frontera, debi na e exodo di Venezolanonan y pa asina impedi cu lo produci riesgo di espera largo y acumulacion di persona.
E autoridadnan no a reporta incidente den ultimo dianan, pa via di e labor di e personal di agencia humanitario internacional, como tambe di miembronan di siguridad y di Forsa Arma, cu ta colabora cu e plan di contingencia.
