Siman pasa gobierno di Aruba a tuma tur tipo di medida pa stroba e virus di COVID-19 di plama mas tanto posibel y pa limita e consecuencianan di esaki. Esaki ta pa motibo cu actualmente Aruba ta pasando den temponan duro.

Ta trata di medidanan pisa, manera Toque de Queda y Shelter in Place, cu ta hopi impactante riba bida di nos ciudadanonan, pero cu ta necesario pa proteccion di salud di tur hende.

Cuerpo Policial di Aruba ta controlando e Toque de Queda y otro medidanan intensivamente.

Multanan halto ta wordo duna na esnan cu kibra e medidanan y na mes momento Polis ta haci un yamada na ciudadanonan pa cumpli cu e medidanan. Ta di sumo importancia pa sigui tur ordo y yamada di Polis.

Autoridadnan lo no tolera violacion di e reglanan y medidanan.

Ministerio Publico lo mantene ley strictamente contra personanan cu no tene nan mes na reglanan of cu dificulta trabao di Polis. Lo actua duro contra esnan cu usa e crisis di COVID-19 pa viola ley y haci maluso di e situacion.

E lucha contra COVID-19 lo por ta exitoso solamente si nos tur bringele hunto.

Ministerio Publico ta haci un yamada grandi na un y tur pa coopera cu otro na interes di pais Aruba y su ciudadanonan. Ta hunto so nos por proteha salud di nos ciudadanonan.

 

LEAVE A REPLY

Please enter your comment!
Please enter your name here