Movimento RAIZ como organisacion politico a forma e Academia di Bon Gobernacion (ABG) Motibo cu a lansa e Academia ta pa forma personanan interesa den hiba un forma diferente di haci politica. E forma nobo lo ta basa riba integridad y transparencia. Den cuadro di esaki Academia di Bon Gobernacion lo ta ofreciendo lecturanan tocante diferente tema.
E lecturanan lo tuma lugar tur diamars di 7or pa 9or di anochi den ATIA Building na Dakota, cuminsando for di 21 di juli 2020 te cu 27 di october 2020
Temanan cu lo wordo trata lo ta: Staatsrecht, Comptabiliteits verordering en begroting, Gemeenschappelijk hof van Justitie, Deugelijk bestuur, Sustainable development goals (SDG’s) y por ultimo Algemene Beginselen van behoorlijk Bestuur. Lecturanan lo wordo duna na Hulandes y Papiamento.
E Academia di Bon Gobernacion lo duna bo persona e oportunidad di hisa bo conocemento riba diferente area relaciona cu nos derechonan estatal. Profesionalnan cu lo duna e lecturanan durante ABG ta e.o Sr. Luciano Milliard, Sra. Francielle Lacle y Sr. Armand Hessels.
Participacion na e Academia di Bon Gobernacion ta completamente gratis.
Si bo persona ta sinti bo mes yama y kier sa mas di nos movimento, registra awe mes via www.raizaruba.com. Cupo ta limita.
Pa mas informacion por mail na info@raizaruba.com of app na e number +297 5949787.
Hunto nos ta lanta un Aruba nobo.
