Un subasta di gobierno Hulandes di frecuencianan cu companianan di telecomunicacion mobil por usa pa provee comunicacion di velocidad halto 5G a recauda 1.23 biyon euro, segun e minister responsabel pa e benta a bisa ayera.
Tres compania, KPN, T-Mobile y VodafoneZiggo a cumpra bandwidth, segun secretario di Estado pa Asunto Economico, Mona Keijzer.
E subasta online di e frecuencianan di 700, 1,400 y 2,100 megahertz a cuminsa dia 29 di juni ultimo, cu gobierno bisando cu lo recauda un minimo di 900 miyon euro.
KPN a bisa cu a gasta 416 miyon euro riba un total di 75MHz di spectrum pa un periodo di 20 aña. “E licencia nobo ta permiti nos mehora mas ainda e calidad di nos servicio mobil y nos ta emociona pa pronto lansa servicionan 5G pa nos clientenan”, CEO di KPN, Joost Farwerck a bisa den un declaracion.
Un frecuencia di 3.5 gigahertz lo ser subasta despues, pasobra su uso pa rednan 5G por interferi cu trabou di un facilidad di intercepcion di comunicacion di satelite den nort di Hulanda, usa pa agencianan di inteligencia Hulandes.
E subasta ta pa bandwidth usa pa proveedornan, y no ta involucra directamente e infrastructura pa rednan 5G, cu ta e enfoke di debate internacional.
Keijzer a bisa cu solamente ‘proveedornan confia’ por suministra partinan ‘critico’ di e infrastructura 5G nobo di Hulanda. Sinembargo, el a bisa cu gobierno ainda no a prepara un lista di proveedor cu companianan di telecomunicacion por usa pa construi nan red di velocidad halto.
“Mi no t’ey ainda pasobra mester tin un analisis profundo di e situacion y mi ta haciendo esaki hunto cu mi colega, minister di Husticia y Siguridad”, Keijzer a bisa AP. “Y nos no a yega na e punto ainda unda nos por hacie.”
