Cu un decreto, presidente Trump a aumenta hasta mas presion riba negociacion entre Microsoft y e compania mama di TikTok.

 

Haci negoshi cu Bytedance (mama compania di TikTok) lo wordo prohibi den 45 dia, a menos cu e companianan ta logra yega na un acuerdo. Anteriormente, Trump a bisa cu e app lo disparce riba 15 di september, e dia di e deadline, si no lo tin un deal. E efectonan preciso no ta ainda conoci. Un scenario posibel ta cu e app no lo por wordo haya for di e tiendanan di download di Apple y Google.  Microsoft a confirma dialuna cu tin discusion di un adkisicion.  Ayera, Financial Times a informa, contrariamente na loke Microsoft a bisa den pasado, e compania ta buscando si e por adkiri operacionnan di TikTok for di henter mundo.

Dato di usuario di Merca
Trump ta wak TikTok como un riesgo di siguridad, e temor di e gobierno Mericano ta cu e gobierno Chines por haya acceso na data di usuarionan Mericano via Bytedance. E compania ta nenga esaki. E presidente ta adverti ademas cu e app por wordo utilisa pa campañanan di desinformacion na man di Partido Comunista Chines. P’esey Merca ta tumando “reglanan agresivo contra e propietarionan di TikTok pa protege nos siguridad nacional.” Trump a bisa.

 

Autoridad Hulandes di Proteccion di Data ta investigando e app, dirigiendo e pregunta si TikTok ta “diseña y proporciona pa mantene privacidad di su usuarionan”. TikTok a anuncia ayera cu e compania a inverti 420 miyon euro pa un centro di dato den Irlanda; Data di usuarionan Europea lo wordo almacena aki ora e sitio ta operacional, cuminsando na 2022.

Den respuesta, TikTok a bisa cu e ta conmociona cu e decreto. “Gobierno no ta duna atencion na e hechonan, dictando terminonan di un acuerdo sin proceso legal, y ta interferi cu negociacionnan entre partidonan priva.” Cu esey, e compania tambe ta referi con Trump ta interfiriendo cu combersacionnan di adkisicion entre TikTok y Microsoft.

 

Ademas di TikTok, gobierno Mericano ta puntando un decreto similar riba WeChat; esaki tambe ta cuminsa aki 45 dia. Trump ta bisa cu e app ‘automaticamente ta captura informacion di su usuarionan den cantidadnan grandi’. Segun e presidente, asina e Partido Comunista Chines por haya acceso na informacion personal di ciudadanonan Mericano.

 

A diferencia di TikTok, e app aki no ta asina popular na Merca. E ta un servicio importante na China si. Simplemente, e ta un app di chat, pero den e app e usuarionan por haci hopi mas via mini-programanan’. Asina ta posibel, por ehempel, pa cera un seguro, haci reserva y pagonan. Compania mama di WeChat, Tencent, a cay un 10 porciento despues di publicacion di e noticia.

A compensa perdida un poco, pero net prome cu ceramento, ainda e compania ta den cora.

E app tambe ta importante pa contacto entre persona y companianan na Merca y China. E analisis di corant Mericano ta spera cu e impacto di e decreto lo ta mayor na esun di TikTok.

LEAVE A REPLY

Please enter your comment!
Please enter your name here