(AP)—E estado di New York lo crea un comision encarga di considera compensacionnan pa adresa pa efectonan persistente y dañino di sclavitud dentro di e estado, bao di un legislacion firma den ley pa gobernador Kathy Hochul diamars.
Esaki ta bin durante un tempo unda hopi estado y ciudad na Merca ta purba di resolve con pa maneha e pasado scur di e pais, y ta sigui den e stapnan di forsanan di tarea similar na California y Illinois. “Aki na New York, nos kier pensa cu nos ta den e banda corecto. Sclavitud tabata un producto di e South, e Confederacion,” segun Hochul, un democrat, a bisa na e ceremonia di firmamento. “Loke ta dificil pa acepta ta e hecho cu nos estado tambe a florece for di e sclavitud ey. E no ta un storia bunita pero en ta e berdad.”
Bao di e ley, cual a ser aproba pa legisladonan na juni, e comision di investigacion lo examina e extento den cual e gobierno federal y estatal a apoya e institucionnan di sclavitud. E lo investiga con New York, cual a aboli sclavitud completamente na 1827, a participa den e transferencia di Africanonan sclavisa y e efectonan andante di e institucion riba residente color scur awendia. E comision di nuebe miembro lo mester entrega un rapport un aña despues di su prome reunion. Su recomendacionnan por posiblemente inclui compensacion monetario pero lo no ser obligatorio. Su descubrimentonan ta diseña pa motiva cambionan politico y resulta den programa- y proyectonan cu ta purba di remedia e efectonan negativo di sclavitud riba residentenan color scur.
E idea di uza placa di pueblo pa compensa e descendientenan di hendenan sclavisa casi sigur lo trece cune critica, incluyendo for di hende blanco cu no ta kere nan mester paga pa e pecadonan di nan antecedentenan, y otro grupo etnico cu no tabata envolvi den e comercio di sclavitud. Hocul y otro legisladonan a enfatisa durante e ceremonia cu e proceso lo yuda habri oportunidad pa combersacionnan tocante loke reparacion por ta. E gobernador y e lidernan legislativo di e asamblea y senado estatal lo apunta cada un tres miembro cualifica pa e comision. Nan tin 90 dia pa haci nan escogencia.
Lider republicano di senado estatal Rob Ortt a bisa den un declaracion cu e ta kere cu e recomendacionnan di New York lo trece cune un “costo astronomico” pa tur residente di New York. “E reparacionnan di sclavitud a ser paga cu e sanger y bidanan di miles di Mericanonan cu a lucha pa caba cu sclavitud durante e Guera Civil Mericano,” el a bisa. El a agrega cu no ta realistico pa estadonan cumpli cu e posibel prijs halto cu lo bin cu compensacion monetario.
Na 2020, California a bira e prome estado pa crea un forsa di tarea pa compensacionnan. E grupo a entrega su rapport na legisladonan na juni, ken despues a introduci un legislacion cu lo crea un agencia pa suministra algun di e 100 recomendacionnan di e panel, incluyendo yuda famia cu investigacion genealogico. Pero pa transforma e propuestanan ey den politica por ta dificil, mirando cu e estado ta enfrentando un deficit den presupuesto grandi.
Dos otro estado, incluyendo Massachusetss y New Jersey, a considera pa studia compensacionnan, pero ningun a aproba legislacion. Un bario den Chicago, Illinois, a bira e prome ciudad pa haci compensacionnan disponibel pa residentenan color scur via un proyecto di vivienda di 10 miyon dollar na 2021. E congreso Mericano a pidi despensa pa Afromericanonan pa e historia di sclavitud na 2009, pero un propuesta federal pa crea un comision pa studia compensacion a ser poni riba pausa pa basta tempo caba.
