Ayera mainta durante un conferencia di prensa di minister di Turismo y Salud Dangui Oduber conhuntamente cu hunta di Directiva di HOH, Jacco Vroegop hunto cu Gregory Croeze a ofrece un conferencia di prensa pa asina ey papia mas tocante e noticia aki.
Minister Oduber a señala cu esaki ta un ehempel pa tur e instancianan y companianan di gobierno. E ta un stap importante den cuadro di e implementacion di “Landsverordening Beperking Tabaksproducten (AB 2016 no.41)”.
Manera ta conoci e ley aki a drenta na vigor dialuna 2 di mei 2022, e ley aki ta prohibi na tur menornan di 21 aña pa cumpra, usa of pa traha den areanan cu ta bende productonan di tabaco, tambe e ley aki ta prescribi cu ta prohibi pa huma den un edificio of area cu ta accesibel pa tur hende.
Pa e motibo aki HOH a dicidi pa implementa e ley caminda no ta permiti pa huma sigaria, sigaria electronico of cualkier otro producto cu tin como contenido tabaco riba tereno di HOH, LABHOH y Bloedbank, tampoco paden di edificio, incluyendo e area di parkeo y policlinicanan.
Minister Oduber a señala cu e ley cu ta limita e uso di productonan di tabaco ta un di e aspectonan importante den Aruba su plan nacional di prevencion den salud, cu ta dedica na mehora e calidad di bida, servicio y salud di Aruba su comunidad.
Di su parti Jacco Vroegop di Hunta di Directiva a señala cu “HOH, LABHOH y Bloedbank tin como punto di enfoke brinda e miho cuido y servicio posibel na nos pashentnan y clientenan. E salud di nos empleadonan, pashentnan y bishitantenan ta nos prioridad y p’esey como e unico hospital riba e isla y pues tambe embahadornan di cuido di salud na Aruba a tuma e decision pa haci Hospital liber di huma y pues no sigui facilita humamento mas.” segun el a señala.
Hospital ya pa algun luna ta trahando duro dunando informacion y ofreciendo colega trayecto di coaching si nan tin interes pa stop di huma lidera pa e specialistanan di pulmon. Tambe a traha riba un plan si encaso un pashent admiti den HOH tin un of otro adiccion na un producto di tabaco con lo anda cu esaki y ki caminda lo por cana pa brinda asistencia.
Ta importante pa menciona cu ta den ley pa personanan no mag di huma riba instancianan publico, den caso cu un persona ta drenta huma den algun area di hospital, Gregory Croeze miembro di directiva tambe a sigura cu lo tin personal encarga cu ta bay acerca e persona aki pa pidi stop di huma y si den caso lo yega asina leu, nan lo mester envolvi cuerpo policial den esaki pa motibo cu hospital mes por haya boet pa esaki.
