Ayera mainta a tuma luga un conferencia di prensa pa asina trece informacion tocante e circunstancianan den cual lastimamente un baby di cuater luna a perde su bida, ora e tabata bao cuido di personal di un crèche na Aruba.

Tabata dia 24 di maart di e aña aki ora comunidad a keda consterna cu un hecho poco comun, unda varios medio di comunicacion a reporta e hecho di un baby di cuater luna cu no tabata reacciona. Despues riba diferente rednan social a keda conoci cu e baby a fayece den circunstancianan cu te na e momento ey no tabata conoci pa comunidad.

Noemi Maduro, mama di baby cu tabata yama “Noah”, conhuntamente cu e dokter pediatra Eric Arends y hefe di ambulance Liberato Hoek, tabata esun encarga di aclaria loke a sucede e dia ey, caminda nan kier a laga como mensahe cu conscientisacion y prevencion ta elementonan crucial pa tur hende.

Pa loke ta trata e hechonan, el a conta cu baby Noah e dia ey a yega crèche 7:15 di mainta y te 8:00 am pasa a keda sinta den un “baby carrier” .Noah a ser saca di e “baby carrier” y  poni den e box y e trahado pedagogico a bira bay coy otro baby. Den caso aki nan a señala cu e Babykamer semper mester ta bao supervision, e accion di a saca e baby pone den otro ambiente  cu ta e box, mester a wak ki e reaccion y accion ta y keda na tur momento den e babykamer.

Den cada parti doloroso cu e mama a describi den e conferencia di prensa, tambe el a bisa cu el a sinta cu diferente dokter na mesa y a ser informa cu no ta existi carrier, bouncer, wieg, stoel di hala patras pa un baby di 127 dia, cu su wervel kolom no ta ni forma ainda. Cu e persona encarga no mag di sali di babykamer, cu e baby mester keda na tur momento bao di supervision.

Un baby ta ser poni boca bao “met bij zijn van een ander”, cu presencia di un hende pa asina ey training di e garganta pa versterking y despues ta ser poni na e unico forma cu ta pone un baby di 127 dia, di banda, batiendo suave riba su lomba.

Normalmente ta yama 911 prome na momento di cualkier situacion; pero e dia ey, esaki a tuma luga despues di basta tempo. Den e caso aki ambulance tabata 2 minuut leu di e crèche, “cu si lo a yama nan prome, nan por a yuda mi yiu”.

E mama a sigui bisa cu a pone baby Noah boca bao y den esaki el a comparti cu como trahado social, e sa cu e t’ey pa yuda, pero den e caso di baby Noah, no a yama 911. Esaki mirando cu e mes, personalmente a haya yamada e dia ey pa 8:33am unda e personal di e crèche a inform’e cu su baby no tabata reacciona.

“Ambulance ta keda 2 minuut leu for di e crèche, pues ambulance por a yega basta lihe.” E mama a sigui conta cu el a yama number 100 y a confirma despues cu ta polis Wouters, kende na su turno a yama 911, y pa 8:37 am e “first responder” a sali y a yega 8:39 am na e crèche.

Hefe di ambulance a informa con e proceso di ambulance ta bay ora cu un melding ta drenta ora tin un casonan di e tipo aki, cu ta conforma di diferente pasonan cu mester wordo sigui. E prome paso ta prevencion, despues nan ta sigui cu e yamada unda cu e parti basico ta e cuido medico, caminda su prome fase ta e yamada na 911. Ora un persona ta constata cualkier emergencia medico cu tin di haci cu un mucha mester yama 911.

Na momento cu ta yama e linea aki, si e persona no sa kico pa haci, e centralista ta guia e persona den e proceso di kico mester haci den espera di ambulance. Y e parti avansa ta ora e ambulance ta yega y ta tuma e cuido over, unda cu despues ta bay na e cuido medico mas avansa na hospital.

Hoek a señala cu personal di kinderopvang mester por ta getrain pa duna cuido na e momento di cualkier tipo di incidente. “E mayoria di melding cu nos ta haya pa mucha di entre 0 pa 4 aña ta problema respiratorio, cu ta un 15%, pero esey ta hopi pa nos cu ta un isla chikito”, Hoek a comenta.

Den e caso di baby Noah, Hoek a splica cu nan ta kere cu si e yamada a wordo haci na tempo, nan por a yuda e baby pa tin un resultado positivo.

Ta importante pa scolnan y crèche cu ta traha cu mucha ta getrainpa e parti aki. El a bisa cu na ImSan tin un departamento dedica na diferente training di cuido medico y ta duna e training aki na profesionalnan specialista den area aki.

Di su parti, dokter pediatra Eric Arends, kende ta traha na Aruba for di aña 2001, a informa tocante cierto puntonan di baby Noah y kico ta e causa di su fayecimento. Ttin biaha tin muchanan cu tin defecto desde cu nan ta nace of ta desaroya cierto enfermedadnan den nan bida, pero baby Noah ta un caso diferente, el a sigura, cu e tabata un mucha saludabel.

Tocante e autopsia, el a splica cu prome nan ta check e curpa den e parti di pafo pa wak si tabatin algun mal formacion y cu den su curpa nan no a haya nada particular of algo cu por afecta su salud. Den e otro parti di autopsia nan ta examina e curpa den e parti di paden y nan ta visualisa diferente organonan cu un “microscoop onderzoek” y den e proceso aki nan a haya den e trakea un substancia blanco, cu no tabata normal pa ta eynan.

Su curason tabata mustra normal, igualmente su pancreas y su parti digestivo como stoma, y manera a menciona caba, cu baby Noah tabata un baby saludabel y cu “practicamente no tabatin splicacion pakico el a fayece di un manera asina”.

E mama di baby Noah a trece dilanti cu conscientisacion y prevencion mester traha hunto, cu e proceso cu a tuma luga dia 24 di maart cu su yiu no a bay bon y cu “tanten cu e mama aki tin salud, tin bida y tin rosea, dia 24 di maart no ta sucede mas. Pasobra mi ta bay traha incansablemente cu departamentonan di gobierno y tambe esnan no di gobierno pa salvaguardia cu e dia aki no ta ripiti mas”.

Igualmente el a comenta cu proximamente ta bay tin proyectonan pa salvaguardia e muchanan, “pasobra loke a pasa no mag di bolbe pasa”, el a finalisa.